یاشاسین آذربایجان - Long live Azerbaijan

.

چاليشمالاريميز آز اولسادا، بير چوخلو سويداشا اؤرنک اولوب. سئوينه رک دئمه لييک کي بو گون بير چوخلو خبر مرکزي، اؤيرنجيسل وبلاگلار و دانيشما توپلوملاري يارانيب. اینترنتدن اولان قورخو اورتادان قالخماغا باشلاييب و آنا ديلينده يازماغ، سهولي اولسادا بيله اؤز يئرين آلماغدادير. باي بک بونلارا غورورلا باخيب و اينانير کي اگر بير گون چاليشمالاري دايانسا بيله، يئري هئچده بوش اولماياجاقدير. ايلک آرزوموز ميلتيميزي باش اوجاليغي و سون آرزوموزدا ميلتيميزين باشا وجاليغيرير. باش اوجا اولماغ اوچون، اؤزگور ياشاماليييق. بوتؤو آذربايجان ديله ييله، يئني ايلينيزي بير داها قوتلاييريک. باي بک ايليميزي تورک مدنييتي نين باشلانقيجيندان سايير. ۱۱۰۰۸-اینجي ايلنيزي قوتلو اولسون.

---

---

گئچن ايل باي بک اوچون چوخ آنلاملي بير ايليدي. گئچن ايل باي بک باشلاتديغي يولدا بير چوخلو آدديملار آتيلماسينا تانيغ اولدوق.

باي بک ۴ ايل بوندان اؤنجه ياراندي. ايلک ايل سسسيز چاليشارکن، بيردن بيره بيلگييه سوسوز اينسانلارلا قارشيلاشدي. ۴ آي ايچينده باي بک زيارتچيلري نين ساي آرتدي، پلانلانميش ايمکانلار بونا جاوابدئه اولا بولمه دي. باي بک مجبورن ايمکانلارين گوجلنديرمه لي اولموشدور.

تام ايشلر حاضيرلانارکن، کامپیوتر پروبلئمي اورتايا چيخدي. يازيلميش اولان نه وارديرسا يئني سئرويسه داخيل ائديله بيلمه دي. اونا گؤره يئنيدن باشلاميش کيمين، آدديم آدديم يئني سئرويسيميزي يولا سالديق.

باي بک ياراناندا، آذربايجانا، خسوسيله گونئي بؤلومونه عايد چاليشقان بيلگي مرکزي يوخيدي. بير نئچه شخصي و يا قوروم سيته سي واريدي، آنجاق اولانلار اسکي ايمکانلارييلا، گئج گونجللنه رک ميللي ماراخلاريميزا لازيمي جاوابي وئر بيلميرلردي.

باي بک اینترنت دونياسيندا آذربايجان اوچون بير چوخلو ايلکه ايمضا قويوب. ايلک اولاراق، آرتيق 24 ساعات آچيق اولان و تئز-تئز گونجل اولان بير بيلگي مرکزي ايشه باشلاميشدير. سون ايمکانلارا سؤيکنه رک، قيسسا زاماندا چوخلو زيارتچي توپلامشدير.

باي بک يالنيز آذربايجان ميللي منافعينه ايناناراق، هر بير قوروما يا شخصه، هر بير دوشونجه دن اولسالاردا دانيشما حاقي وئرميشدير. اينحيصارچيليق ائتمه دن، آيري-سئچکيليک ائتمه دن هر کسين سسي باي بک-دن ياييليردي.

خرداد ۱۳۸۵ قييامي باشلانارکن، باي بک دايانمادان، گئجه-گوندوز چاليشاراق آني خبرلري ميلتيميزه چاتديرماغي باشاردي.

او گونلرده اولان چابالاريميزين سونوجوندا، ميللي قيياميميز يايقين بير شکيلده دونيايا بيلديريليردي. خبرلر، اکسلر، ويدئولار و يوروملار، ميللي فاللارين بيلديريلري و دانيشيغلاري، توتولانلار و ايشکنجه اولانلار، ياراليلار و ميللي چاپدا اولان قالخيش، فارس و باتي خبر آگئنتليکلري نين قويدوغو بايکوتا راغمن باي بک طرفيندن ياييليردي.

بو يولدا، باي بک-ه بيلگي گؤندرن، باي بک-اي اؤزونونکي بؤلن سويداشلاريميزين امکلري بير داها ميللي ايستک و ميللي گوجوموزو اورتايا قويوردو. باي بک ديرلي اينسانلاردان کي بيلگي و متئرييال گؤندره رک بيزي آياغدا ساخلاييبلار باغرينا باسيب و هئچ بير زامان بيزي يانليز بوراخماديقلارين آلقيشلايير.

البتته کي بو يولدا بير چوخلو دادسيز اولايلار و سيخينتيلار چکديک. ايلک اولاراق ايران آدلانان اولکه نين حاکيمييتي نين باي بک-ه اويقولاديغي فيلتئر دئييلمه ليدير.

خرداد ۱۳۸۵-دان سونرا باي بک آغير بير شکيلده فيلتئر اولموشدو. ايران آدلانان اولکه ده ياشايان سويداشلاريميز، اینترنتين تانينماميش اولدوغو حالده، ايسلام حاکيمييتي نين قورخولو و باسقيلي اورتامين ياراتديغي بير يئرده، باي بک فيلتئر اولموشدو. ميلتيميزده فيلتئر سينديران تانيمايان چوخدو، حتّی فيلتئر سينديران قوللانانلارين قورخولو حاللري بيله باشقالارينا قورخو تؤرديردي. بيردن بيره زيارتچيلرين ساي آزالدي و حتّی گونئيدن گلنلري ساي سيفيرا يئندي.

بونا قارشي، باي بک ميل سرويسين ايشه سالدي. بير نئچه ايچريده ياشايان سويداشين يارديمييلا، ایميل واسيطه سيله خبرلريميز دواملي ايچريه ده کي آدرئسلره گؤندريليردي. آرديجيل اولاراق، بير سيرا گؤنوللو گئنج وبلاگ آچاراق باي بک-ده اولان خبرلرين عئينيسين يايماغا باشلاديلار. بو ايش چوخ فايدالي اولدو.

باي بک ايلک ايشه باشلاديغيندان بري باشقالارين امکليرينه سايقيلي اولماغا چاليشيب. بونا گؤره ده باشقالاريندان قارشيليقلي سايقي گؤزله يير. بير سيرا سويداش، بيله رک باي بک خبرلرينه ال آپاراراق، اونلاري اؤز آدلارينا يايماغا باشلاديلار. بو اولاي بيزي اوزوردو. ندن کي آذربايجانا خبر مرکزي گرکلي اولماسين بيل بيله، بئله تقلبلار يئني يارانميش خبر مرکزلرين گوجسوز ائديب و اونلاردا اولان ايسته کي آرادان آپاريردي. اعتيراض ائتديک، بير سيرا قبول ائديب و چاليشديلار، آنجاق بير سيراسي اؤز تقلبلارينا دوام وئرديلر. باي بک اينانير کي آذربايجانا چاليشان هرکس ساغلام دوشونجه لي و سايقيلي اولماليدير.

باي بک آرتيق بؤيوموشدور و باشقا ديللرده ياييلماسينا بير چوخلو سويداشيميز اؤنري وئريردي. آنجاق ايقتيصادي و اينساني باخيمدان چوخ زور شرطلر آلتندايديق. بولارا راغمن، باي بک گئنه ده ايلک اولاراق اينگيليسجه بؤلومون ايشه سالدي. خبرلرين هاميسي باي بک طرفيندن اولماسادا، ان آزيندان بيزه عايد اولان خبرلرين آذربايجان سيته سيندن ياييلماسي اؤنم داشيردي.

اينگيليسجه بؤلوم ايشه باشلارکن، ايچريدن و ديشاريدان اولان زيارتچيلرين ساي آرتدي.

فيلتئر سينديران يارانماسي بير گرک اولموشدو. بونا گؤره باي بک آدليم اولان PHProxy سئرويسين گونجل ائديب و تورکجه يه يه چئويره رک، اونو ائوجيل سئروئرلره اويقون بير شکيلده حاضيرلادي. بو سئرويسي بير چوخلو سويداشميز آليب و قوللاناراق بير چوخلو فيلتئر اولونموش آذربايجان سيته سينه وارميشلاردير.

گونئي سورونلارين قوزئيده کي سويداشلارلا پايلاشمالييديق. باي بک داها بير ايلکه ايمضا آتاراق، لاتينجه ده آذربايجان تورکجه سينه اؤزل بير بؤلوم ياراتدي. بو بؤلومده قوزئيده اولوب بيتنلر، هابئله گونئيده باش وئرنلر يئر آليرلاردي. کؤچؤر پروگرامی آرتیق بای بک-ین بیر پارچاسی اولوبدور. بوردا بو پروگرامی یارادانلاردان تشکر ائدیب و ده یرلی ایشلرین آلقیشلاییریق.

ايلکينده سويداشلار بو بؤلومو قوزئي حاکيمييتينه قارشي اولاراق گؤردولر، آنجاق زامان ايچينده بيلديلر کي باي بک چاليشير او تاي بو تاي سويداشلاريميز اؤزگور اولاراق دئموکراتيک بير اورتامدا ياشاسينلار. حاکيمييت يا موخاليفتين آنتي-آذربايجان آدديملاري تارتيشيلاراق، باي بک-اين هاقلي اولدوغون ايثبات ائتدي.

ایلگینج اولاراق، بای بک سازیلارینا ایستیناد ائدن بیر نئچه قوزئیلی ژورنالیست، محض بونا گؤره موحاکیمه ائدیلدیلر.

ايندي، باي بک ۳ بؤلومده يايينلانير. آنجاق، باشقا اولکه لرده، باشقا ديللرده ياشايان سويداشلاريميز بير سيرا مقاملارا بيلگي وئرمک اوچون، او اولکه نين ديلينده يازيلميش خبرلره احتيياجلاري اولدوغونو بيلديريرلردي.

باي بک اؤز اينگيليسجه بؤلومونده آزدا اولسا آذربايجاندا اولايلاردان خبر يازيردي. بو ايمکاني داها گئنيشلنديرمک اوچون، اوتوماتيک ترجومه سئرويسين سيته يه آرتيردي.

اوتوماتيک ترجومه سئرويسي گوگل و ياهو سئرويسلرين قوللاناراق، سيته نين يارپاغلارين ۱۰ ديله ترجومه ائتمگه باشلادي. ياهوو سرويسين ده ييشه رک ايشلريميزده آخساقليق اورتايا چيخدي. آرديجيل اولاراق او سيته لرين سئرويلري هر زامان چاليشماديغي اوچون بعضن سورونلار ياراندي. آما نه اولسادا، باي بک يازيلاري ۱۳ ديلده اینترنت آخداريش موتورلارينا داخيل اولاراق آرخيو اولونوردو.

بيزه يازان سويداشلار بيلديريرديلر کي باي بک اعتيمادلي اولاراق بير چوخلو دئولت دئپارتمانلارينا سونولوب و اونا ايستيناد ائديليبدير.

بو یولدا دادسیز اولایلاردا باش وئردی. هک سالدیریلاری، تهددیدلر و تخریبلر. آنجاق دوستدان گلن داش هم یارالار، همده یاندیرار و ایز بوراخار.

دادسيز اولايلاردان بيري ايسه گوناز تی.وی-ده باي بک-ه قارشي آپاريلان تخريبات آدلانديريلماليدير. ايلک اؤنجه گوناز باي بک-اي بير ميللي سيته آدلانديريب و هر بير اولايي اونا ايستيندا ائده رک يايماغا باشلادي. بو ايش اولدوقجا يارارلي و اؤنمليدي. آنجاق بير سيرا تينقيد و اؤنريميزدن سونرا، گوناز اوز ده ييشه رک باي بک-اي بير خايين سيته آدلانديردي و ميلتدن ايسته دي کي اونا داخيل اولماسينلار چون باي بک ايران آدلانان اولکه نين اطلاعاتينا چاليشير و سويداشلاري نين اؤزل بيلگيلرين توپلاياراق اونلاري فارسلارا ساتير!

بو چيرکين ايشه تام آغيرليق باسماغ اوچون، گايپ آدلانان قورومون سؤزده سؤزجوسون اورتايا آتيب و ايستکلرين اونون ديليندن دئديلر. اوتانج وئريجي بوراسي اولدو کي بو آدامين کامپیوتردن آنلاماديغي حالده، تکنيکي اوزمان اولاراق چيخيش ائتديرديلر! گولومه لی و آغلامالي صحنه لر باي بک آرخيوينده وارديرلار و هر زامان يارا کيمين اؤرگيميزده يئر آليبلار.

اونلار حتی بای بک دن آلدیقلاری یازیلار و عکسلری باشقا سیته لر آدینا یایدیلار. آنجاق گؤرمه دیلر کی بای بک-ین آدی و مارکی او یازیلاردا و عکسلرده ثبت اولونوبدور. بو عاغیل آلماز تقلبلارین گؤرونتولری آرشیوده یئر آلیب.

بو چيرکين قارا ياخمادان سونرا، باي بک اؤنجه دن ياپديغي ايمضا کامپانييالارين دايانديردي، وئرديگي پئتيشينلري باغلادي و توپلو شکيلده باغلانتيلارين قيسيتلادي. بيزيم آماجيميز ميلتيميزه سس اولماقيدي، اونلاري اولکوتمک دئييلدي.

ماراخلي بودور کي ۲ ايل باي بک-ه قارشي تخريبات آپاران گوناز تی.وی هله ده اؤز پروقراملارينا باي بک-دن آلديقلاري شکيللرله کي باي بک آدرئسيله دامقالانيبلار باشلايير. باي بک-اي خاطيرلاديقجا تخريب ائت، آما هر گون اونون آدييلا ايشلريوي باشلا!

ايل ۲۰۰۷ دير و آرتيق ايران آدلانان اولکه ده اینترنت يايقينلاشيب و فيلتئر سينديرانلاري قوللانانلارين ساي آرتيب. بونا قارشي، فارس حاکيمييتي باي بک اوچون 3 سوييه ده فيلتئر اويقولاماغا باشلادي. کليمه، آدرس و İP فيلتئري بيزه اولاشماغي ايمکانسيز حاله گتيرميشدي. بونا گؤره بير سيرا ده ییشيکليکلر وئره رک، İP فيلتئرين آشماغا باشارديق. آنجاق ايکي فيلتئر هله ده آدرئسيميزده آغيرليق ائدير.

باي بک اوتوماتيک اولاراق صحيفه لرين آنباردا ساخلار. نورمالده هر بير صحيفه ني آچماغ اوچون اونون تام يوکلنمه سين گوزله مک لازيمدير. آنجاق باي بک اونلاري داها اؤنجه دن حاضيرلاياراق، قيسسا بير زامان ايچينده زيارتچييه گؤسترير. بو ايش ايران آدلانان اولکه ده ياشايان سويداشلار و هيزسيز اینترنت قوللانان سويداشلاريميز اوچون يارديمجي اولور، آنجاق باي بک زيارتچي ساييسين آز گؤسترير.

گونجل اولاراق باشقا سيته لرده اولان بيتنلر باي بک ايشلملرينده اؤزل يئر آليب. بير چوخلو سيته و وبلاگ ليسته سي واردير کي آذربايجانا قارشي و يا آذربايجاندان يانا چاليشيرلار. اونلاري باشارديقجا اينجله مک و تپکي گؤسترمک باي بک اوچون اؤنملي بير گؤرئو اولوبدور.

باي بک اؤز تجروبه لرين گونوللو اولاراق پايلاشماغا جهد گؤستريب. بو يولدا بير چوخلو سئرويس ايجاد ائديب و بير چوخلو سويداشا اینترنت دونياسينا گيريش ائتمکده يارديمجي اولوب. آرديجيل اولاراق، يئني سئرويسلري تورکجه يه چئويره رک گونجل ايمکانلاري ميلتيميزه سونوب. يازيقلار اولسون کي بير چوخلو سئرويس قوللانيلمادان بوراخيلديلار. تورکجه سئرويسلري قوللانمايان سويداشلارين چوخو فارسجا سئرويسلرده داها چاليشقان يئر آليبلار.

بير ايل ايچينده باي بک-اين يايديغي خبرلرين سايسي و ديلي بئله دير:

تورکجه (گونئي: ۲۰۳۵، قوزئي: ۲۳۵۷): ۴۳۹۲
اينگيليسجه: ۱۶۱۶
فارسجا: ۲۷۰۶
بؤيوک توپلام: ۸۷۱۴
گونلوک: ۲۴ خبر سيته ميزده يايينلانيب.

بو يازيلاردا خبر، يوروم، شعر و مقاله يئر آليبدير. آذربايجانا عايد اولان سيته لري 90% صيرف فاسجادا يازيليرلار. بونا حتّی آذربايجان قوروملاري نين سيته لريده داخيلديلر. باي بک سئوينه رک بيلديرير کي بيزيم تورکجه يه وئرديگيميز اؤنم تايسيزدير. گرامر دوغرو اولماسادا، بو دؤنمده آنا ديلينده يازماغ اؤنمليدير.

بعضن اولور کي سويداشلاريمیز يازي گؤندريب آنجاق آدلاري نين يازيلماماسين طلب ائديرلر، بعضن اولور کي سويداشلاريميز باي بک-اي اؤزلرينه ضيد گؤروب و يازيلارين بيزه ياساق ائديرلر، بعضن اولور کي ایميل قوروپلارا يازي گؤندريب و اونون يايينلانماسين ايسته ييرلر.

بو سويداشلارا دئمه لييک کي، بيزيمله باغلانتي قورمانيزا هر زامان سئوينميشيک. بيزه يازيلان هر بير خبر و يازي اؤزل اولاراق ده يرلنديريليب و لازيمي ايشلم اونا گؤره ياپيلير. اگر بيزدن ايسته یيبسيز کي آدينيز وئريلمه سين، کسين بو ايش اويقولانيب و کيمليگينيز قورونوب. اگر يازيلارينيزي بيزه ياساق ائديبسيز، بو سيزين ايلک هاقلارينيزداندير، بيز اونا سايقي گسته ره ريک. اگر ایميل قوروپلارينا يازي گؤندريبسيز آنجاق باي بک-ده اونو گؤرمه ييبسيز طبیعدير. ندن کي ایميل قوروپلاريندان گلن بيلگيلرين بيزه گؤندريلمه سيندن امين اولا بيلمريک، اونا گؤره بو آدرئسلردن گلن يازيلار ده يرلنديريلمزلر. باي بک اينانير کي هر بير يازي نين آرخاسيندا بير شخص و بير آدرئس اولمالیدیر، بو ايش گرکليدير و بيز هر زامان اونا اويموشوق. يازيلارينيزين باي بک-ده يايماسيني ايستييرسز اگر، لوطفا بيزيم آدرئسه گؤندرين. فرق ائتمز کي بيزيمله بيرليکده باشقالارينا دا گؤندريلسين، آنجاق ایمیل قوروپلاريندا بيزيم آدرئسي ايشه آلمايين.

باي بک ياخين گونلرده بير مودت چاليشماياجاق. 4 ايل گئجه گوندوز چاليشماقدان سونرا، بير آزدا اولسا دينجلمک لازيم گؤرونور. ميللي چاپدا چاليشان يورولماماليدير، آنجاق بير سيرا ايسته نيلمه يه ن سورونلاردان اؤتور بو تعطیلليک قاچينمازدير.

بيز هر زامان دئديگيميز کيمين، تنقيد، اؤنري و يارديم اوچون آچيق گؤز و قولاغلا حاضيريق. بو گونه قدر هر بير تنقيد اوچون اينانديريجي ايشلم ياپيليبدير. سهولريميز دوزلتيليب و بيزه سهولريميزي خاطيرلادان سويداشلاريميزا سيجاق تشکر ائديليب. بيزه گوج وئرن سيزين تنقيدلرينيز و اؤنريلرينيز اولوبدور.

يئني ايل هاميميز اوچون برکتلي اولسون آرزو ائديريک. يوردوموز نامينه جان و ماليندان گئچن هر بير آذربايجانليني آناراق، سيز عزيزلره جان ساغلیغي و باشاريلي چاليشمالار ديله ييريک.

چاليشمالاريميز آز اولسادا، بير چوخلو سويداشا اؤرنک اولوب. سئوينه رک دئمه لييک کي بو گون بير چوخلو خبر مرکزي، اؤيرنجيسل وبلاگلار و دانيشما توپلوملاري يارانيب. اینترنتدن اولان قورخو اورتادان قالخماغا باشلاييب و آنا ديلينده يازماغ، سهولي اولسادا بيله اؤز يئرين آلماغدادير. باي بک بونلارا غورورلا باخيب و اينانير کي اگر بير گون چاليشمالاري دايانسا بيله، يئري هئچده بوش اولماياجاقدير.

ايلک آرزوموز ميلتيميزي باش اوجاليغي و سون آرزوموزدا ميلتيميزين باشا وجاليغيرير. باش اوجا اولماغ اوچون، اؤزگور ياشاماليييق. بوتؤو آذربايجان ديله ييله، يئني ايلينيزي بير داها قوتلاييريک. باي بک ايليميزي تورک مدنييتي نين باشلانقيجيندان سايير. ۱۱۰۰۸-اینجي ايلنيزي قوتلو اولسون.

باي بک
۲۹/۱۲/۱۱۰۰۷

، بیر میللتین سسی
پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش ۱

1. 
   

   : یاشاییش سویلییر

   اودگؤن ۲۹ بوز آی ۱۱۰۰۷ @ ۱۱:۵۶ گ.ؤ

   عزیز و حورمتلی وطنداشیم
   یئنی (۱۳۸۷) اینجی گونش ایلین یئتیرمه سین سیزه و بوتون آذربایجانین باشی اوجا خالقینا تبریک ائدیب ، بیله ییزه یئنی ایل ده باشاریلار و اوغورلار آرزیلاییرام.
   اومورام یئنی ایل آذربایجان اوچون تام بیر اوغورلو ایل اولسون.

   یاشاسین آذربایجان

RSS بو یازینین گوروشلرینین یمی