قانلی بیر میدان! - حسن جداري

بای بک، آذربایجان | ايشنبه صاباحی, 9th اسفند , 2008 اینجی ایل, چولا 17:19 [pm] | تورکجه, شعر

آلتي (۶) يوز ایل بوندان ایره لی، آذربایجانین اولو شاعیری عمادالدین نسیمی نی، آزادلیق دوشمنلری حلب شهرینده دارا چکیب ده ریسینی سویوب ئولدوردولر. بو شعر، نسیمی نین شانلی خاطیره سینه ایتحاف اولونور.

یوزونده، شوری، شوقی، شانی گوردوم
سوزونده، منطقی، برهانی گوردوم
گوزونده، کیپلیکینده، هم قاشیندا
وقاری، هیبتی، طغیانی گوردوم

گوزل سیماسینه، دقتله باخدیم
چمنده، لاله نی، ریحانی گوردوم
متین اشعارینین، هر جمله سینده
عدالت سیزلیگه، عصیانی گوردوم

اونون شعرینده، تاپدیم، اوج عشقی
دنیزده، دالغانی، طوفانی گوردوم
حیاتیندا، او شانلی قهرمانین بای بک
بوتون ایشکنجه نی، زیندانی گوردوم

او زیندانلاردا، او ایشکنجه لرده
قارانلیق، قورخولی، دورانی گوردوم
باخیب تاریخه، شرقین اورتاسیندا
حلب ده، قانلی بیر میدانی گوردوم

چکیلمیش داره، او میدان ایچینده
اناالحق سویلیین، قوربانی گوردوم
وفا کویینده، جانانین یولوندا بای بک
اولان ئوزقانینه، غلطانی گوردوم

او گون، شهر حلب ده، هر طرفده
یئره،ناحق توکولموش، قانی گوردوم
او یارین قتلینه، فتوی وئرنده
الینده، مفتی نین، قرآنی گوردوم

دریسینی اونون، دوشمن سویاندا
بدندن آیریلاندا، جانی گوردوم
عمادالدین، اناالحق، لب لرینده
وجودینده، بوتون، جانانی گوردوم

نسیمی ده، او تمکینی، گورنده
بشرده، قدرت ایمانی گوردوم
باخیب او عزت و شان و جلاله
دیار عشق ده، سلطانی گوردوم

قارانلیق لار، بوتون، چیخدی یادیمدان
چراغان، نور ایله، هر یانی گوردوم
جهالت دن، فلاکت دن، قوتولموش
بوتون دنیاده، هراینسانی گوردوم

، بیر میللتین سسی
پایلاش | پرینت

بعضی عکسلر خبره باغلی اولمایا بیلیر. لطفا دیقتتلی اولون

بورا باغلي يازيلار:

گوروش کاپانیبدی

http://www.baybak.com بای بک سایتیندان پرینت اولوب
http://www.11007.baybak.com/4656.azr یازینین اینترنت آدرسی

azeribaybak[at]gmail.com

ياشاسين آذربايجان - Long live Azerbaijan