اعلمی نین آذربایجان حاقدا دانیشما ندنی؟!- ابراهيم رشيدي (ساوالان)
بای بک، آذربایجان | آنناآخشامي, ۴-ي دوندوران , ۱۱۰۰۷ اینجی ایل, چولا ۰۰:۴۲ | تورکجه, مقاله
 |
. | ایندیسه بو پیلانین سون آددیمی اونون آدای لیقدان صلاحیت سیز اولماسی ایله یئکونلاشیر.واونو داها آرتیق آذربایجانچی و حاکمیت قووه لرینه تنقید ائدن بیریسی کیمی تمثیل ائدیر. من دوکتور اعلمی نین قارشیندا دئییلم اودا آذربایجانلی اولاراق من کیمی آذربایجان مقدراتیندا حاقلی دیر. آنجاق اونا سؤزوم بودورکی هر گون یئنی بیر فیرتینا قوپارتماق یئرینه وکیللیک دؤورونده نئچه فابریکانین تبریز گتیرمه سینه ها بئله ۱۵–اينجی اصلین وورغولادیغی حاقلاری آلماغا چالیشسایدی داها دیرلی اولوردی، آماندیر ایسته مه سین حاکمیت طرفیندن اولان یاشیل چیراق گوجونه، اوندا اولان دانیشیق آزادلیغی گوجونه دوستاقلاردا یاتان عباس لسانی، سعیدمتین پور، بهروز صفری، جلیل غنی لو و ائشیکده ائولرینده دوستاق اولان حسن دمیرچی، علیرضاصرافی، حسن راشدی، غلامرضا امانی، جواد حسن پور و باشقالارینین یئرین قاپساماغا چیرمالانسین. اوندا من کسینلیکله ایناناجاغام بو کیشی حرکتیمیزی تصاحب ائتمه یه، حساس مرحله ده میللتیمیزی بیر داها اوچوروما سالماغا دیرچه دیلمیش. |
بو گونه قدر ایران ایسلام جمهوریتینده هر کیم قوروقچو شوراسی (نگهبان) نظارتیندن سس قازانیب، آدای اولموش کسینلیکله بو سییاسال قورومون گوونلی و آرخایین آدامی دیر. ایراندا هامی نین آدای اولماق حاققی یوخدور، آدای اولانلاریندا هامی سینین سئچیلمک آزادلیغی یوخدور. منجه ایندیه قدر، ایراندا سانسور قووه لرینین اولدوقجا گوجلو هابئله غئیردئموکراتیک اولدوغوندان، آذربایجان اولوسونا یانان و اونون تاپدانمیش حاقلاریندا مودافعه ائدن کیمسه ایسلامی شورا مجلیسینه یول تاپمامیش.
آما دوکتور اعلمی ایکی دؤنه چئشیتلی ایستیراتژیک آراشدیرما کومیته لرین موافق نظریله قوروقچو شورانین صلاحیتین قازانیب بیر سیرا گیزلی اللرین حیمایه سی ایله ایسلامی شورا مجلسینه یول تاپیب و هر نه دن اوستون مجلیسین ان یوکسک ایختیارلی اورقانی اولان میللی امنیت قوروما کومسییونونا داخیل اولموش !!
ایسلامی شورا مجلیسینین میللی امنیت کومسیونون اویه سی دئییلن ده منجه بو شخصین کیم اولدوغو بللی اولوب آرتیق آچیقلاما ایسته میر.یالنیز فرقلی دوشونجه لره حؤرمتله یاناشدیغیمدان بیر سیرا دوسلارین وریندن آرایا قویولان سورغولاری یانیتلاییرام. باخیشیمین نه قدر دوغرو اولدوغونا ایناندیغیما باخمایاراق او قدر ده یانلیش اولدوغو محتملدیر آما یانلیز دئموکراسییا دایاناراق اؤزباخیشیمی آچیقلاییب باشقا فیکیرداشلارین قضاوتینه تاپشیریرام.
نییه اعلمی آذربایجان حاقدا دانیشیر؟ بو قونودا دانیشماقدان نه ایسته ییر؟ آماجی نه دیر؟ منجه بو سورغونون یانلیشلیغی اؤزونده دیر. بیز نییه اعلمی نی اولدوغو کومسییوندان آیری دوشونوب ایزوله آراشدیراق؟ اعلمی بیر توپلومون اویه سی دیر. او قوروم حاقلی دیر هر زامان اویه سی نین داورانیشیغیندان ، دانیشیغیندن راضی اولماسا یا بو اویه او قورومون قیرمیزی جیزگی لریندن چیخسا قاباغیندا دایانیب اونو سوچلاسین. بئله لیکله مجلیسین امنیت کومسییونو اعلمی نین سؤزلریله راضی دیر ایندیسه سورغو بئله دیر.
ندنسه ایران مجلیسینین میللی امنیت کومسییونو آذربایجان حاقدا سؤز آچیر؟
اونلارین بیزیم حاقدا آرا بیر آرا سؤز آچمالاری مجبوریت اساسیندادیر. آذربایجانین قانلی خورداد قیامینین زوروندادیر. اونلارین آراشدیریچیلاری آذربایجان میللی حرکتی ایرانین ان چوخ نوفوسلو فارس اولمایان میلتی نین و اینقیلابلار بئشیگی نین ان گوجلو مبحثی اولدوغونو دوشونور، بئله لیکله اونو قاپساییب جذب ائتمک ایسته ییر.
بو ایشین بیرینجی ال وئریشلی سونوجو: گله جکده بو حرکتین هر بیر ائشیکده یاشایان آنتی رژیم پروسئسینه یاخینلاشماسیندان مانع اولور.
ایکینجی:آذربایجان حرکتینده گونو گوندن آرتماقدا اولان ایستیغنا و مرکزی قووه لره لاقئیدلیک باخیشینا مانع اولوب بیر داها مجلسین یالانجی وعده لرینه اومودلاندیرماق.
اوچونجو:بوتون گوناهلاری اؤزوموزه و میللتیمیزه قایتارماق”ایراندا شوونیزم یوخدور بیز اؤزوموز باجاریق سیزیق، یوخسا اعلمی کیمی وکیل لر مجلیسه گؤندرسک حاققیمیزدان مودافعه ائده جک”
سورغو بوراسی دیر هانسی مدافعه؟ ایندیه قدر اعلمی وریندن مودافعه اولموشسا هانسی سونوجا اوغراییب؟ هئچ بیر سونوج الده ائتمه میشسه بو مودافعه نه یه یارار؟
ایندیه قدر اعلمی نین مودافعه لری نتیجه سینده هانسی توتوقلانمیش میللی چالیشقانیمیز بیراخیلمیش؟ هانسی فارس بؤلگه لرینه کؤچموش فابریکامیز قاییتمیش؟هانسی اوخولدا دیلیمیز بیر ساهاتلیق اولسون دئیه اوخونموش؟ بیز هئچ زامان بئله مودافعه لر سونوجوندا حاقلاریمیزا چاتمایاجاغیق. یول باشقادیر، یولچو باشقا.
حؤرمتلی دوسلار ایجتیماعی حرکتلرین گوجلری نین توپلانیب جمعی داورانیشا چئوریلمه سینه ان گؤزل یول کیچیک و وئجه گلمه ین سؤزلرله او حرکتین بالقوه گوجلرین ایستیحاله یه چکیب داغیتماقدیربلکه قویماسینلار بیزیم حاق ایستکلریمیز و شوونیزیمدن اولان نیفرتیمیز قالانیب یاندیریجی تونقالا چئوریلسین…
اینام درگی سینده اوخودوم اعلمی دئییب:ارکین حریمینده موصللا تیکیلمه سی بو بینانی تخریب ائدیر.کیچیک و وئجه گلمه ین سؤز یانی بو.دوکتور جنابلارینا سؤیله یین بو بینا ۲۷ ایلدن آرتیق دیر سؤکولوب فاتحه سی اوخونوب، خورماسی پایلانمیش.
سیزجه ایران مجلیسینین میللی امنیت کومسییونونون اویه سی بئله دانیشقلارلا نه آختاریریر؟ آذربایجانا اینه اوجو قدر فایداسی اولمایان سؤزلرله راحاتجاسینا مینلر دوستاقدا اولان قهرمانلاریمیزین یئتیردیگی حرکته داخیل اولوب حساس مرحله ده اینحرافا چکسینلر. بیزی بیر داها ایستکلریمیزه یاخینلاشاندا بئجردیکلری باشجی لارین الیله یئنی دن فارسلارا قول ائتسینلر.
ایندیسه بو پیلانین سون آددیمی اونون آدای لیقدان صلاحیت سیز اولماسی ایله یئکونلاشیر.واونو داها آرتیق آذربایجانچی و حاکمیت قووه لرینه تنقید ائدن بیریسی کیمی تمثیل ائدیر. من دوکتور اعلمی نین قارشیندا دئییلم اودا آذربایجانلی اولاراق من کیمی آذربایجان مقدراتیندا حاقلی دیر. آنجاق اونا سؤزوم بودورکی هر گون یئنی بیر فیرتینا قوپارتماق یئرینه وکیللیک دؤورونده نئچه فابریکانین تبریز گتیرمه سینه ها بئله ۱۵–اينجی اصلین وورغولادیغی حاقلاری آلماغا چالیشسایدی داها دیرلی اولوردی، آماندیر ایسته مه سین حاکمیت طرفیندن اولان یاشیل چیراق گوجونه، اوندا اولان دانیشیق آزادلیغی گوجونه دوستاقلاردا یاتان عباس لسانی، سعیدمتین پور، بهروز صفری، جلیل غنی لو و ائشیکده ائولرینده دوستاق اولان حسن دمیرچی، علیرضاصرافی، حسن راشدی، غلامرضا امانی، جواد حسن پور و باشقالارینین یئرین قاپساماغا چیرمالانسین. اوندا من کسینلیکله ایناناجاغام بو کیشی حرکتیمیزی تصاحب ائتمه یه، حساس مرحله ده میللتیمیزی بیر داها اوچوروما سالماغا دیرچه دیلمیش.
عباس لسانی دئمیشکن: بو گون دیکتاتورلارین، جانیندان دویموش کیچیک دسته لرین توفنگ الده داغا چیخماسیندان قورخوسو یوخدور، اونلار خالق ایچینده اؤزونه یئر آچمیش حرکتلردن قورخورلار. من عباس بیین سؤزون بئله دوشونورم:
اونلار خالق ایچینده اؤزونه یئر آچمیش قالخیشلارین اصیل و دوغرو آیدین لارین واسیطه سیله یونتیلمه سیندن قورخورلار.
سوندا دئمه لییم کی:گووندیگیمیز سیته لرین کؤکو بللی اولمایان کیمسه لری بلکه شوونیزم بالتاسی نین اؤزوموزدن اولان ساپ لارین رئکلام ائتمه سی گله جک خوردادلاردا میللتیمیزی باشقالاریندان سؤز ائشیتمه یه چاغیرماقدیر.
، بیر میللتین سسی_ _ _ _ _ _ _
مربوط اُلان یازیلار
- ===> اکبر اعلمي-نين صلاحييتي سئچکيلر اوچون اونايلانماييب!
- ===> استفاده از ماهيهاي خطرياب دست پرورده شوونيسم فارس در آذربايجان
- ===> انتخابات نمایشی رژیم فارس و راهکارهای پیش روی آذربایجان
- ===> شما ديگر چرا به هويت طلبان ميگوئيد مشتي تجزيه طلب ناچيز! جناب دکتر اعلمي؟
پایلاش | پرینت
- تاپيلمادي
http://www.baybak.com
بای بک سایتیندان پرینت اولوب
http://www.11007.baybak.com/4214.azr
یازینین اینترنت آدرسی
گوروش کاپانیبدی