چاغداش تاريخيميزين پلان آرخاسي و چاغداش ميللي هرکاتيميزين موباريزه و مقصد ستراتئژيسي! (سکيزاينجي بؤلوم)

چاغداش تاريخيميزين پلان آرخاسي و چاغداش ميللي هرکاتيميزين موباريزه و مقصد ستراتئژيسي! (سکيزاينجي بؤلوم) - رحيم جاوادبيلي

بای بک، آذربایجان | هفته دٌردی, 25th آذر , 2007 اینجی ایل, چولا 05:13 [am] | تورکجه, مقاله

نفتين ميلليلشديرمه سي مسئله سيني اورتايا گتيرن ايچ و خاريجي سبب و عاميللر نه ايدي؟ نييه محض ميللي هوکومتيميزين دئوريلديگيندن سونرا ميللي مذهبيلرين يارانماسي ايله تظاهور ائتدي؟ميللي مذهبيلر کيملر ايدي؟ هانسي طبقه ني هانسي کسيمي تمسيل ائديردي؟بو طلبين کؤکونده داخيليمي يوخسا خاريجي عاميلمي دايانيردي؟داخيلي عاميل دوروردوسا گؤره سن او ايجتيماعي سياسي بؤهران ايچينده قيوريلان ايجتيماعيتده بئله بير طلبين اورتايا قويولماسينا و نفتين ميلليلشديريلمه سينه نايل اولماق مومکونيديمي؟ خاريجي عاميل دايانيرديسا او گوج هاسيسي ايدي؟ نه يه گؤره نه الده ائتمک اوچون او ستراتئژيدن يارارلاندي، يارالانديسا ايسته ديگيني الده ائتديمي ؟ و ديگر بو قبيلدن سواللارا رئالليغي گئرچکليگي اکس ائتديرن جاوابلاري تاپماق اوچون غرضسيز آراشديرمالارا آذربايجان گوزوندن باخماق حالا گرکلي بير مسئله دير.

بو اونودولماماليدير کي، ايستيقلاليت ستراتئژيسي بوتون پروبلئملرين هللينه داير يئگانه و ان دوغرو ياناشما طرزيدير!

۳.۲ نفت صنایعسي نين ميلليلشديريلمه سي و ياخود دا کي، مصدق دؤورو:

مرحوم پیشه وری نين باشچيليق ائتديگي بير ايلليک ميللي هوکومتيميز سووئت روسيه سي نين آرخا چئويرمه سي و قارشي طرفله آنلاشماسي نتيجه سينده بؤيوک و تصوير ائديلمه سي هارداسا مومکون اولمايان ايتگيلرله اوزلشن گونئي آذربايجان چوخ آغير دؤورونو کئچيرمکده ايدي. آذربايجان دوردوقجا آدي قهرمانليق سيمگه سي اولاجاق ف. ايبراهيميلرين ، اون مينلرجه فدایي نين آسيلماسي، قتل عامي ، يوز مينلرله اينساني نين سورگون ائديلمه سي دؤورونو ياشايان گونئي آذربايجان ائلجه ده اؤلکه نين باشقا بؤلگه لري بو دؤنمده ايقتيصادي آچيدان آچليق و صفالت ، سياسي آچيدان بوشلوق و باشي دومانليليق ، ايجتيماعي آچيدان ايسه اؤلکه ني کابوس- قورخو بورويه رک دهشتلي آنلاريني کئچيرمکده ايدي.

نفتين ميلليلشديريلمه سي و يا خوددا کي، مصدق دؤورونون سياسي پروسئسي بللي اولدوغو کيمي اؤز روشئيميني ميللي هوکومتين دئوريلمه سيندن آلاراق ستارت گؤتورموشدور.ب ب

مصدق دؤورو ايران يؤنوملولر طرفيندن يئترينجه اله آلينميش و اينجلنميشدير، لاکين گونئي آذربايجانيدا ايچرن بو دؤنمه آذربايجان آچيسيندان نه اله آلينميش نده کي اينجلنميشدير. بو دؤنم گئنيش اينجلنمه يه احتيياجي اولان بير دؤنم اولدوغوندان دولايي بيز کئچري شکيلده او پروسئسين ماهيتينه ايليشکين باخيب آچيقليق گتيرمگي مقصده اويغون ساييريق.

مصدق قاجار تورک سولاله سيندن اولموشدور. آتاسي مصدق السلطنه قاجار حاکيميتي نين فارس عيالتينده بؤيوک وظيفه توتان و گئنيش توپراق صاحيبي اولان آدليم شخصلريندن بيري اولموشدور.مصدق ۱۵-۱۶ ياشلاريندا اولارکن آتاسي وفات ائتديگيندن دولايي دؤولت وظيفه لري نين موروسيليگي-ايرسيليک هوقوقونا اساسلانديغينا گؤره آتاسي نين مصدقولستنه تيتولونو و وظيفه سيني اوستلنه رک دؤولت قوللوغونا گيرميشدير.بير مودت خوراساندا ، شيرازدا چئشيتلي وظيفه لرده ائلجه ده تبريزده واليليک وظيفه سينده خيدمت ائتميشدير. مشروطه سونراسي اوچونجو ميللي مجليس سئچکيلرينه اصفهاندان بؤيوک مولکدار اولاراق قاتيلميش و مجليسده بولونموشدور.ب ب

مصدق تحصيلاتيني ايسوئچره (سوئد) ده فرانسيز ديلينده هوقوق ساهه سينده اوخوموشدور. ۱۹۶۵/۱۳۴۴– جو ايل ساواک –ين بوراخميش اولدوغو دؤولت اهمميتلي گيزلي سندلره اساسن مصدق السلطنه ملکم خانين فراماسونئر ايجماعلاري نين عوضوو اولموشدور. شيرازدا ۱۹۲۰-اینجي ايلده واليليک وظيفه سيني توتماسيندا مودتي نين آرتيريلماسيندا اينگيليس سفيري نين بؤيوک رولو اولموشدور.ينگيليس سفيري تئهراندا لورد کورزنا اونوانلاديغي راپوردا بو اؤزونو تام آچيق شکيلده گؤسترمکده دير، لاکين بونلارلا ياناشي مصدقولسلتنه ۱۹۲۵/۹ آبان ۱۳۰۴–اونجو ايلده مجليسين فراکسييا عوضولري رزا قولدورون اصلینده ايسه اينگيليس سفيري نين گؤستريشي ايله رزا قولدورو قاجار تورک دؤولتي نين واريثي ، يئني قورولاجاق دؤولتين شاهنشاه حاکيمي ، اوردونون باشچيسي کيمي رسميلشديرن سنه ديني ايجبارا زورا باخماياراق ايمضالامايان ، قبول ائتمه ين و اونا قارشي چيخان 4 نفردن (مدرس ، تبريزلي تقي زاده ، دولت آبادي و مصدق السلطنه دن عيبارت) بيري ايدي. مصدق او تاريخدن 20 شهريور ۱۳۲۰/۱۹۴۱-اینجي ايلدک سياسي آرئنادان قيراقدا رضا قولدورون ايقتيدارينا ساکيت موخاليفتده کئچيرميشدير.

مصدق رضا قولدورون اؤلکه دن ايخراج ائديلديگيندن و اوغلو محمدرضا آتا يئرينده انگليس طرفيندن سلطنت تاختيندا اوتوتدورولدوغوندان سونرا موتتفيقلرين گيريشيمي ايله اؤلکه ده يارانميش آزاد سياسي فضادا نيسبتن محمدرضا نين سلطنتيندن يانا اولاراق يئنيدن سياسي مئيداندا بولونماغا باشلاميشدير.گونئي آذربايجان ميللي هوکومت دؤورونون سونلارينا تسادوف ائدن يانيلميرامسا 15-اینجي ميللي مجليس سئچکيلرينده سئچيلمه ميشدير.نؤوبتي سئچکيلرده ۱۶-اینجي ميللي مجليسين ميلت وکيلي اولاراق آکتيو سياسي فاليته باشلاميش و بو فاليتي ۱۹۵۳/ ۲۸ مرداد ۱۳۳۲-اینجي ايلدک – يعني ۵-۶ حربي ظابيطين ۳-۴ ايخراج ائديلميش حربي گئنرالين او جومله دن باتمانقيلينجين ،تيمورتاشين ، زاهدي نين ، اؤز کوره که ني نين ،باش پليس ايداره سي رييسي نين و ب. تشببوسکارليغي ايله باش توتموش دينج چئوريليشه قدر سورموشدور.چئوريليشدن سونراکي حياتي نين بير قيسميني تخمينن ۳-۴ ايليني نيسبتن دينج سورگونده کئچيرميشدير.

مصدق شخصي خوصوصيتينه گؤره آغيرليقلارا ، زورلوقلارا دؤزومسوز اولان توتدوغو يولا اويغين کاراکتئري اولمايان- يعني اينقيلابي احوال-روحيييه يه يئترينجه صاحيب اولمايان بؤيوک تورک مولکدار عاييله سينه خاص داورانيشلارا ماليک آريستوکراتيک شخص اولاراق ليبئرال دئموکرات و عدالتي اؤزونون باشا دوشدويو کيمي عدالتلي اولماغا چاليشان بير شخصيت کيمي کاراکتئريزه ائتمک مومکوندور. دوغرودور، مصدق اؤزونو هئج زامان بير اينقيلابچي کيمي کاراکتئريزه ائتميردي، لاکين بو آيدين مسئله دير کي، نفتين ميلليلشديريلمه سي کيمي نهنگ بير ميللي ايش بؤيوک موباريزه طلب ائدن اينقيلابي بير هرکات و بؤيوک اينقيلابچيلارين ، مثلن جامال ابدولناسيرلرين نايل اولا بيله جگي ايش و موباريزه ايدي.بونا ايسه نه مصدقده نه امير قولو اولان آیت الله کاشانيده نه هوسئين مکيده ،نه موظفر بقاييده نه آیت الله قرويده نه ده ديگر ۱۹ نفر جبهه قوروجولاريندا، نده کي، بير گون نالا بير گون ميخا ووران توده چيلرده بو احوال-روحيييه ني گؤرمک هارداسا مومکونسوز بير ايشيدي.باشقا طرفدن مصدق سياسي فاليتينده روحي زيفليگيندن دولايي موقاويمتسيز چيخيش ائديردي.ياخينلاري مصدقين بو آرامسيزليغيني و روحي دؤزومسوزلوگونو قيزي نين روحي خسته ليگيندن دولايي ايره لي گلديگيني دئييرديلر، لاکين مصدق اؤيرنجي اولدوغو دؤنمده ده بو راحاتسيزليغي مؤوجود ايدي.ادي گئدن قيزي حال-حاضيردا دا ايسوئچره (سوئد) نين هانسيسا روحي ديسپانسئرينده موعاليجه آلماقدادير.بای بک

مصدق سياسي فاليتي دؤورونده دوست و رقيبلري آراسيندا سئچيم ائتمگي هر آن دييشکن ايدي. بير نؤو پارتنييور سئچيمينده زورلاناراق دوغرو آتديملار آتا بيلميردي.سيياسي سابيتليگي هارداسا کيفايت قدر دئييلدي.مصدقين مشروطه دن يانا اولاراق چيخيش ائتمه سينه باخماياراق مشروطه دؤنمينده آخساق-اوخساق اولسادا قبول ائديلميش بير نئچه قانونو او جومله دن انجمن ايالتي هوقوقونون برپاسينا گؤره قطعي شکيلده اؤز مؤوقئيني اورتايا قويا بيلمه دي.ديگر ياندان ايراندا کي، ميلتلرله باغلي سيياستيني موعينلشديرمکدن تام چکيندي، اونلاري چورومه يه بوراخيلميش پروبلئم حساب ائده رک باجارديقجا اونلاردان اوزاق دورماغا چاليشدي، لاکين ايراندا ايراني مرکز توتان فارس شوورونا اساسلانماسينا باخماياراق هوکومتي نين اينگيليس طرفيندن ياپتيريملارا-تحريملره معروض قالديغي دؤورونده تورکييه يه ائتميش رسمي سفرينده دفعه لرجه اؤزونون اوغوز ائلينه باغلي بير تورک اولدوغونو بيان ائده رک باشچيليغيني ائتتديگي ميللي هوکومتين ايراندا کي، بوتون خالقلارين اؤزلليکله ده تورکلرين ايراده سيني تمسيل ائتديگيني دؤنه-دؤنه بيلديره رک تورکييه لي سويداشلاردان آجيلن يارديم ائتمکلريني خواهيش ائتميشدير.

مصدقين باشچيليغيندا باشلاميش ميللي جبهه هرکاتي و تخمينن ۲۸ آي مودتينده قورموش اولدوقلاري هوکومت ايستر ماهيتجه ايستر کوتله نين قاتيليمي آچيسيندان ايستر بؤلگه نين سياسي پروسئسلرينه تاثير ائتمه قابيليتي آچيسيندان ايسترسه ده نتيجه اعتيباري ايله گونئي آذربايجانين ميللي هوکومتي ايله موقاييسه ائديلميه جک قدر زيف ، رنگسيز و نيسبتن فورمال پروسئس کيمي کاراکتريزه ائديلمه سي مؤوجود فاکتلارا تام اويغوندور. بورادا عوموم خالقين نفتين ميلليلشديريلمه سيندن دوغاجاق مزيتدن کيفايت قدر معلوماتلي اولماماسي ، خالق آراسيندا اوممتچيليگين اساس آپاريجي فيکير اولماسي ، موللاسيز هرکاتين کوتلويلشمه مه سي فاکتورو و ميلت آنلاييشي نين اوتوروشماماسي خوصوصي وورغولانماليدير. اؤلکه ده باش وئرن سياسي اولوشوملار خالقين فيکير اينکيشافي و مفکوره يه دايالي موباريزه سي نين نتيجه سي کيمي دئييل خاريجي گوجلرين منافعي ايجابينجا اوتوروشان اولوشوملار ايدي ، بدبخت خالق ايسه ساده جه سو ايستيمال ائديليردي.بای بک

ايراندا نفت آراشديرماسينا ، چيخاريلماسينا و ايخراجينا داير آنلاشما ايمتييازينا گلديکده قئيد ائديمه ليدير کي، بيرينجي نفت آنلاشماسي موظفرددين شاه دؤنمينده - يعني ۱۹۰۱-اینجي ايلده ۲۰ مين فوند ايستئرلينگ موقابيلينده اينگيليس نوماينده سي ويلليام کونخ دارجي ايله مماليکي مهروسه هوکومتي آراسيندا ايمضالانميشدير، بو آنلاشمايا اساسن نفت چيخاريلديغي تقديرده الده ائديلن خاليص گليرين ۱۶% مماليکي مهروسه يه وئريلمه لي ايدي.ينگيلتره دؤولتي طرفيندن ايداره ائيلن دارجي نفت شيرکتي ۱۹۰۸–اينجي ايلده آنگلو-ايرانيان اويل کمپاني / اينگيلتره- ايران نفت شيرکتي کيمي آدلانماغا باشلاميشدير ، حال حاضيردا بو شيرکت اولوسلار آراسيندا بريتيش پترول (ب.پ) اولاراق تانينماقدادير. ۱۹۱۲-اینجي ايل چئوريليشيندن سونرا رزا قولدورون حاکيميتي ايله اينگيليس نفت شيرکتي آراسيندا ۱۹۳۳/۱۳۱۲-اینجي ايلده يئني موستملکه چي آنلاشما ايمضالانميشدير.بو آنلاشمايا اساسن نفتن الده ائديلن گليردن ايرانين پايي ان آشاغي حدده ۱۷% موعينلشديريلميشدير . بو نفتن الده ائديلن گلير ايسه 16 ايل رزا قولدورون حاکيميتي دؤنمينده بير ايل بئله اولسون دؤولت بودجه سينه داخيل ائديلمه ميشدير.

هاميسي –يعني خاليص نفتن گليرين ايرانا مخصوص حيصه سي اينگيلتره نين ايکينجي اوچونجو درجه لي بانکلاريندا سيتيرلينگه عوض ائديله رک رضا قولدورون شخصي نوماينده سينه وئريلميشدير، او ايسه اروپا بانکلاريندا اؤزلليکله ده ايسوئچره (سوئد) ده رضا پهلوي نين شخصي حسابينا داخيل ائتميشدير.همين بو پوللار رزا قولدور اوغلونون خئيرينه هوکومتدن کنارلاشديريلديقدان سونرا سورگونه گئتمزدن اوغلونا دئور ائتميشدير،دئور ائديلن پولون مبلغي ۶۸ ميليون تومن اولموشدور. خاتيرلاديلماليدير کي، ايران دونيانين ان بؤيوک نفت آييرما فابريکينه ، خام نفت ايخراجاتينا گؤره دونيانين ايکينجيليگينه و نفت احتياطينا گؤره دونيانين اوچونجولوگونه ماليک ايدي.

باکي ، مي ۲۰۰۷
آردي وار…