چاغداش تاريخيميزين پلان آرخاسي و چاغداش ميللي هرکاتيميزين موباريزه و مقصد ستراتئژيسي! (اؤچونجو بؤلوم)

چاغداش تاريخيميزين پلان آرخاسي و چاغداش ميللي هرکاتيميزين موباريزه و مقصد ستراتئژيسي! (اؤچونجو بؤلوم) - رحيم جاوادبئيلي

بای بک، آذربایجان | چرشنبه, 5th آذر , 2007 اینجی ایل, چولا 02:13 [am] | تورکجه, مقاله

تسنيفلشمه نين حاقيندا ايضاحاتا کئچمزن اؤنجه قئيد ائديلمه سي يئرينه دوشر کي، اؤلکه ده دؤورون سياسي-ايجتيماعي حياتيندا اساس سؤز صاحيبي اولان يوکسک سويييه لي دين خاديملري هر اوچ قوروپدا بولونماقدا ايديلر ،لاکين نه يازيقلار کي، بير چوخ دين خاديملري عئيني مؤوقئدن – يعني جمعيت آراسيندا اؤز سينفي هئژئمونلوقلاريني قوروماق نامينه هر شئيه اؤزلليکله ده اينگيلتره ايله تام ايشبيرليگينده بولوناراق اؤلکه نين موستملکه حالينا دوشورولمه سينده بؤيوک قاتقيدا بولونموش اولدولار ، بورادا مشروطه هرکاتيندا اؤنده گئدن موجدهيدلرين (مرجع تقليدلرين) گئري چکيلمه سي مشروطه نين مغلوبيتينده اساس رول اويناديغي خوصوصي وورغولانماليدير.

… آزربايجان تورک ميلتي وار اولدوغو تورپاقلاردا ۸-۷ مين ايلليک مدني تاريخه ماليکدير. دونيانين ان ايلکين پارلاق سومئر و ايلام مدنيت و عنعنه وي دؤولتلريني ياراتميشدير. شرقين تورک منشالي ماد، اورارتو ، اشکان، آتروپاتئن، آلبان کيمي ايسلام اؤنجه سي و ايسلام سونراسي نهنگ تورک دؤولتلري نين او،جومله دن سونونجوسو اولان قاجار تورک عنعنه وي دؤولتيني قوروب،قورويوب اينکيشاف ائتديرن ميلت اولموش و حال هازيردا ايسه ميلت اولاراق او،دؤولتلرين بوتون گوجلولوگو، ضعيفليگي، ياخشيليغي و يا خود دا پيسليگي ايله تام هوقوقي واريثيدير. ماراقليدير کي، بو گون تورک دؤولتلري عظمت و بؤيوکلوگوندن آرتيق اؤز دؤورلرينه گؤره ايره ليچي-موترققي پرور، اينسانسئور اولمالاري، ميللي عدالته سؤيکنمکلري،يبتيداي دئموکراتيک سيياست يوروتمکلري و اينتئلئکتين-شعوورون اينکيشافيني مودافيعه ائتديکلري ايله کاراکتئريزه ائديلير و يوکسک قييمتلنديريلير. بو کيمي زنگين و انگين مدني تاريخي ياشاميش آذربايجان تورک ميلتي ،ونو و مماليکيل مهروسه ده (ايراندا)ياشايان ديگر خالقلاري تمسيل ائدن قاجار تورک سولاله سي نين تورک دئموکرات روحلو مدنيتيندن اوزاقلاشاراق فارس حاکيم زومره سي نين ديسپوتيزم و لووغاليغينا سؤيکنمه سي ايله هم حاکيميتي هم آذربايجان تورک ميلتيني همده غئيري تورکلري مدني ،ئلمي و ايقتيصادي ايره ليلگيشينه سبب اولا بيله جک اساسلي شکيلده چاغداشلاشماقدان چکينمه سي ايله اوچوروما دوغرو سوروکله دي.

قاجار تورک سولاله سي حاکيمييتي غربين چاغداش علمي-نظري و تئکنيکي نايلييتلري ايله سيلاهلانميش غرب سومورگه چي دؤولتلري ايله آپارديغي آرديجيل مغلوبيتلي حربي-سياسي ساواشلاردا ضعيفله ميش و نهايت روس ايمپئرياسي ايله اونودولماز قهرمان عباس ميرزا نين کوماندانليغي ايله جسورجاسينا آپارديغي سون قانلي ساواشلارا باخماياراق ضعيفليک و داخيلي خيانتلر نتيجه سينده ميللي آلچالديجي موقاويله لره - گولوستان (۱۸۱۳)،تورکمنچاي (۱۸۲۸) قول چکمکله اؤلکه نين دؤيوشن و ووران الي، دوشونن بئيني و دؤيونن اورگي اولان بؤيوک آذربايجان پارچالانميشدير. آزربايجانين پارچالانماسي و گره کي لن اؤنمين وئريلمه مه سي بير طرفدن، اؤته ياندان هريس و لووغا فارس آيدين، سيياسي، روهاني و آريستوکراتلارينا (بؤيوک محمد ميرزا شاهدان سونرا ) آنارشيک حدده مئيدان وئرن قاجار تورک سولاله سي حاکيميتي موستقيل سيياست يوروتمکده زورلوق چکير و موستملکه چي دؤولتلرين ديپلوماتيک مانعورلريندن باش قورتارماياراق اوچوروما دوغرو سوروکلنمه يه محکوم اولدو. قئيد ائتمک يئرسيز اولمازدي کي، تورک فارس داعواسي اساسن بؤيوک ناصرالدين شاه دؤوروندن باشلاميشدير. بئله کي،جنوب و مرکزده اينگيلتره نين (انگليس) يئتيرميش اولدوغو فارس ريجاللاري اينگيلتره نين نوفوزو سايه سينده دؤولت ايچي تورکلره قارشي آلتئرناتيو اولوشدورماغا قالخاراق بونا ندن اولموشلار.

نه يازيقلار کي، بو دؤنمده دونيا و نيسبتن بؤلگه خالقلاري ميلليت و وطنداشليق هوقوقونا دايالي دؤولت قورماق اوغروندا ايشغالچي و موستملکه چي دؤولتلره قارشي قورتولوش ساواشي آپارارکن (بونا بؤيوک عوثمانلي نين شرقي اروپا تورپاقلارينداکي، خالقلارين ائلجه ده بؤيوک آتاتورکون کوماندانليغيندا يئني تورکيه نين اؤزونون ميللي قورتولوش ساواشيني ميثال اولاراق گؤسترمک اولار ، لاکين بو بؤلگه ده گئدن ميلت-دؤولت پروسئسينه راغمن ، خاريجي گوجلرين يني اينگيليسله روسيه نين بير باشا موداخيله سي سونوجوندا آذربايجانين باش زومره سينه منسوب آيدين، سيياسي، روهاني و آريستوکراتلاري کؤنولسوز ميلت وا خالقلار ييغيمي اولان مماليکيل مهروسه نين ” ايران ” دؤولت قورولوشونو و اراضيسيني دئموکرات روحلو تورک مدنيتينه داياناراق حاقيقي معنادا چاغداش ، دئموکراتيک و فئدرال سيستئمين ياراديلماسي، ميللي هوقوق و آزادليقلارين تطبیقي کيمي ايجتيماعي-سياسي-مدني-ايقتيصادي-علمي-تئکنيکي ساهه لرده لازيمي ايصلاحاتلاري آپارماقلا قورونوب ساخلانماسيني اساس گؤتوردولر ، بو ايدئولوژي آخيم دا بؤيوک عوثمانلي ايمپئراتورلوغونون قورونولماسيني مودافيعه ائدن مغلوب عوثمانليچيلار کيمي مغلوب اولاراق مئيداني قارشي اؤزونونکو اولمايان اونونکو-بونونکو اولانلارا-يعني ديريژور چوبوغو ايله اوينايان ديرناق آراسي پانفارسيستلره ايستر ايسته مز بوراخميش اولدو .

آذربايجان باشبيلنلري بو يؤنده ده واحيد مقصد نامينه بيرلشبيلميه رک اساسن اوچ بير-بيرينه ضيد طرفده مؤوقع توتدولار کي، بودا آذربايجان تورک ميلتي نين و ضيالي طبقه سي نين ميللي بيرليک ايراده سي نين پارچالانماسينا و بير-بيري نين قارشيسيندا دايانماسينا و بيري نين ديگريني ووروب سياسي آرئنادان ، صحنه دن چيخارتماسينا و دولاييسي ايله بير-بيريني ضررسيزلشديره رک خاريجي قوووه لرين سياسي مانعورلرينه و ايسته ديکلريني اؤلکه ده تطبیق ائتمکلرينه ندن اولدو .

بورادا مشروطه هرکاتينا و اونون ايستکلرينه و قاتيليمجيلاري نين مسئله سينه گيرمزدن اؤنجه مشروطه نين ماهيته و نتيجه اعتيباري ايله دوغورموش اولدوغو وضعيتي ايکي شخصيتين فيکيرلريني گؤسترمکده يارار وار. بيرينجيسي مشروطه سونراسي دوروملا ايلگيلي اينگيلتره نين اهواز شهرينده کي، کونسولو اولان ويلسون سونرالار اؤز خاطيره لرينده يازير : ايرانين دورومو حددن آرتيق خارابدير،نه واختسا بو خالقلار معروض قالميش اولدوقلاري بو آجيناجاقلي وضعيتدن خيلاص اولماق ايستسه لر، فؤوقولاده پارتلاييش باش وئره جکدير. اونلار کي، بو گون سياسي آرئنادا هاي – کولک ساليرلار خالق اوچون دئييل،زيف هوکومتلريني داها آرتيق تزيفه اوغراتماقلا ياناشي خالقين ايراده سيني سو ايستيمال ائده رک يئني مقام و پول الده ائتمک مقصدي گودورلر.۱ ايکينجيسي ايسه اؤلکه ده سولون – ساغا قوربان وئرديگي آذربايجاندا مهممدرزا دؤورونده چاليشان تک باشينا دؤيوشن مرحوم الي تبريزليدير.ه. تبريزلي ان آدليم شاه اثري اولان ديل و ادبيات و يا خوددا کي، عوموميتده دئييلن ديل و ميلليت ده آچيق آشکار شکيلده هاقلي اولاراق دئيير: مشروطه بيز آذربايجانليلارا قاجار تورک دؤولتي نين پانفارسيستلره دئور ائديلمه سيندن باشقا نه وئردي؟ و.س.

مشروطه دؤنه مي نين سياسي تسنيفلشمه ني تخمينن اوچ قوروپدا آشاغيداکي کيمي گؤسترمک اولار:

۱. مؤوجود قاجار تورک سولاله سي حاکيميتي نين تدريجي ايصلاحاتلارلا قورونولوب ساخلانماسيني مودافيعه ائدنلر؛

۲. قاجار تورک سولاله سي حاکيميتي نين مؤوجود وضعيتي مؤوجود دونيا شرايتي ايله اويغون اولماديغيني ساوونان و راديکال شکيلده چاغداشلاشماسيني ايسته ين مشروطه چي و آزاديستان هرکاتي نين قاتيليمجيلاري؛

۳. موستملکه چي گوجلره هم مادي همده معنوي جهتدن ساتيلان ماسونلار و ماسونچولارلا فيکير و عمللري تامامي ايله اوست-اوسده دوشن اکثر فارس روحاني، آيدين، آريستوکرات و سياسيلري .

باکي ، ماي ۲۰۰۷
آردي وار…

۱- ۸.جيلدليک تاريخ روابط سياسي ايران و انگليس - ايرانلا اينگيلتره نين سياسي ايليشکيلر تاريخي - کيتابي نين ۸-اينجي جيلدي . ويلسون اينگيلتره نين مشروطه و مشروطه سونراسي اهواز کونسولو اولاراق اورادا کي نفت قازينتيلارينا و تدقيقاتينا نزارت ائدن شخص ايدي.