چاغداش تاريخيميزين پلان آرخاسي و چاغداش ميللي هرکاتيميزين موباريزه و مقصد ستراتئژيسي! (بيرينجي بؤلوم)

چاغداش تاريخيميزين پلان آرخاسي و چاغداش ميللي هرکاتيميزين موباريزه و مقصد ستراتئژيسي! (بيرينجي بؤلوم) - رحيم جاوادبئيلي

بای بک، آذربایجان | چرشنبه, 28th آبان , 2007 اینجی ایل, چولا 02:07 [am] | تورکجه, مقاله

دؤولت طرفيندن کندلي نين خئيرينه اوزون سوره لي کرئديت-وام ، گرکلي تئکنيکي يارديم ، کند تصروفاتي ايستيهسالي نين گليشديريلمه سي ، مودئرنلشديريلمه سي و مئکانيزلشديريلمه سينه داير گرکن اساسلي آدديملارين آتيلماديغينا گؤره کندلي عاييله لري ان آزيندان آياقدا دورا بيلمک اوچون کند تصروفاتي ايشلريندن يا تامامي ايله يادا قيسمن آيريلاراق کند ، بؤلوک و يا شهرلرده مسکونلاشاراق يوخسوللوق اوزوندن تحصيلدن محروم اولموش ۷-۶ ياشلي معصوم بالالاري ايله برابر ديز-ديزه اوتوروب، اينسانلاري روحن و جيسمن تدريجي حالدا سارسيدان ، ديرناق آراسي هونرمند؟! دئييلن خالچا توخوجولوغو ايشيني سئچمک زوروندا قاليرلار. بو ايسه توخوجولوقلا مشغول اولان ۳–۲ ميليون جيواريندا کي، اينسانيميزي تدريجي صورتده روحي-پسيکولوژي و عصبي گرگينليگينه سبب اولموش و اولماقدا دوام ائدير.

بو اونودولماماليدير کي، ايستيقلاليت ستراتئژيسي بوتون پروبلئملرين هللينه داير يئگانه و ان دوغرو ياناشما طرزيدير!

گيريش:

اينديکي دوروم - مؤوجود شرايت

بيز گونئي آذربايجان تورک ميلتي اولاراق دونيادا تايي-برابري آز گؤرونموش ايستئمار آلتي اولموش بير جمعيتيک. ياراديلميش پانفارسيزم-پان ايرانيزم مفکوره سيني رهبر توتان قوووه نين سياسي، ايجتيماي، ايقتيسادي، مدني، ميللي و عوموميتله هر طرفلي ظولم، فلاکت، منن محو ائتمه-ائتنوسيد و آيريسئچکيليک-آپارتايد سيياستينه معروض قالميش و قالماقدا دوام ائدن بير ميلتيک، يوخ ميلت ذليل اولماز بيز هله جمعيتيک.

اؤلکه ايقتيصادياتي و سنايئسي بويوندوروقلو حاکيم رئژيمين و لورد سؤزونون تخمينن لوغوي قارشيتي اولان صاحيب و اربابلارين تام منافعيينه اويغون شکيلده قورولدوغوندان گونئي آذربايجان شهرلرينده اهالي نين ايش طلباتينا جاواب وئربيله جک ايشيئرلري نين آچيليشينا داير دؤولت ياتيريمي اصلا اولماميشدير. ديگر ياندان اؤلکه نين ان زنگين ياتيريمجيلاري نين-سرمايدارلاري نين بيرچوخونون تورک اولدوغونا باخماياراق همين ياتيريمجيلارين-اينويستورلارين اؤز دوغما يوردلاريندا ياتيريم ياتيرمالارينا و کيلاسيک فورمادا اولموشسادا ايشيئرلري نين آچيلماسينا انگل و مانع تؤرده رک سرمايه لريني فارس عيالتلرينده ياتيرماقلا راضيلاشمالي و يا عکس تقديرده اؤلکه ده کي ، ايقتيصادي پروسئسلردن اوزاقلاشديريلماغا معروض قالميشلار. حتّی پان ايرانيست سيستئم ماراقلي اولان خاريجي ياتيريمجيلاريندا آذربايجان تورپاقلاريندا ياتيريم ياتيرماقلارينادا مانعه چيليک تؤره ديب و تؤرتمکده دير.

بونونلادا بو مودتده دؤولت سيياستي نين تامامي ايله گونئي آذربايجانين عوموميتله تورکون علئيه اينه اولدوغوندان تورک شهرلرينده فابريکلرين-ايشيئرلري نين اولماماسي، بارماق ساييندا وارديسا دا (مونتاژ) ايستحصالدان ايره لي گئتمه ديگيندن نه تکجه تورک توپلومونون آشاغي تحصيللي، اورتا ايختيصاصلي ، حتّی يوکسک ايختيصاصلي گنجلرينده ان ايلکين اينسان هوقوقلاريندان – يعني عدالتلي و الوئريشلي ايشه ماليک اولماق و ايشسيزليکدن قورونماق-مودافيعه اولونماق کيمي هوقوقلاريندان محروم ائديلميش و ايشسيزليک اؤلوم توزو کيمي ميلتيميزين اوزرينه چؤکموش و ۳-اوچ بؤيوک ايجتيماعي فلاکتدن بيرينه چئوريلميشدير. ۳-اوچ بؤيوک ايجتيماعي فلاکت دئديکده ، بيرينجي ميللي محکوميت-محکوم خالق اولماق، ايکينجيسي اينسان هوقوق و آزادليقلاري نين- يعني دئموکراسي نين وار اولماماسي ، اوچونجوسو ايسه ايقتيصادي محروميت نظرده توتولور. دؤولت طرفيندن ايجتيماعي تاميناتين – يعني ايشسيزليک، قوجاليق، ساغلامليق-سهيييه ، منزيل، اوشاق، اؤدنيشسيز گرکلي مادي يارديملي تحصيل و بو قبيلدن گرکلي مادي ايجتيماي خيدمتلرله عاييله و فردلرين تمين اولماق هوقوقو تطبیق ائديلمه ديگيندن و عوموميتله اؤلکه ده بو هوقوقون وار اولماماسي بو ايجتيماعي درد و فلاکته علاوه يوکلنه رک خالقيميزي داها آغير و دؤزولمز دوروما گتيريب چيخارتميشدير.

گونئي آذربايجانين عوموميتله تورکلرين ساي باخيميندان بؤيوک بير حيصه سي نين اوتوردوغو کند و بؤلوکلرده-قصبه لرده کند تصروفاتي ايشلري-اکينچيليک، باغدارليق، مالدارليق و باشقا ساهه لر اوزره بير سيرا رئژيمه باغلي تکلچي-اينحيصارچي کسيمدن باشقا کند تصروفاتي ايستيهسالي همين مونوپوليياچي-تکلچيلردن آسيلي اولاراق عنعنه وي فورمادا قالماقدادير .

کند و بؤلوک موحيطينده چاغداش ياشام طرزي نين، تحصيل سيستئمي نين، ايلنجه ، ساغلامليق-سهيييه مرکزلري نين و.س. چاغداشلاشماغا و يئني ياشاييشا جان آتان اهالي نين ايستکلرينه جاواب وئره بيلمه ديگيندن ايستر-ايسته مز کند و بؤلوکلرين وئريملي تورپاقلاري بوراخيلاراق بؤيوک بير ايشسيز کوتله آخيمي شهرلرده کي عومومي ايشسيزلر کاروانينا قوشولاراق گون-گوندن ايجتيماي قورولوشو پاتلاييش مرحله سينه گتيريب چيخارتماقدادير.ديگر طرفدن گونئي آذربايجانين ايري شهرلري ايشسيزليک فلاکتي ايله چوخدان بري درين و کؤکلو صورتده اوزلشديگيندن همين بو شهر ، قصبه و کند ايشسيزلري ان آزيندان آياقدا دورا بيلمک اوچون مجبورن اؤز دوغما و موقدس يوردلاريني-آذربايجاني ترک ائده رک فارس مرکزلرينده تهقير و حقارته معروض قالاراق اوجوز ايشچي قوووه سينه چئوريله رک آج-يالاويج قالماماق نامينه ايش تاپماق اوغروندا بير-بيري ايله ياريشا گيريرلر.بونونلادا آذربايجان تورکلري نين بؤيوک بير حيصه سي نين يوخسوللوق ، صفالت و ديدرگين حيات سورمکلري نين شاهيديگيک. بو ايسه تورک ميلتي نين شرف و ناموسونون تاپداق آلتيندا قالماسينا دانيلماز باريز بير نومونه دير.

بو گون گونئي آذربايجان ، قاشقاي و قوزئي خوراسان (گونئي تورکمنيستان) تورکلري نين تکجه عومومي دردي پانيرانيست و پانفارسيست گوجون مقصدلي اولاراق يوروتدويو ايقتيصادي سيياستي نين محصولو اولان کوتلوي يوخسوللوق، ايشسيزليک و ايجتيماعي تاميناتسيزليقلا خولاسه ائديله بيلرمي؟ جاواب آيديندير، البت ده کي، يوخ . پانيرانيست سيستئم ايقتيصادي محروميت و بو کيمي ديگر تاکتيکي واسيطه لردن يارارلاناراق نهايي حدفي اولان محکوم خالقي منن محو ائتمک ايستگيني حياتا کئچيرير. دئمک محکوم خالقين منن محو ائديلمه سي پانفارسيست رئژيم اوچون اساس حدفديرسه بيز محکوم خالق اوچونده اساس درد ميللي محکوميتدن قورتولوش يولودور. بيز تورکلر ان اساس ميللي و درين کؤکلره ماليک دردلريميزي ايچدن درک ائتمک، باشا دوشمک و اونو ميللي شعووروموزا ه ک ائتمک اوچون پانيرانيست و پانفارسيست گوجون بيزه قارشي يوروتدويو غئيري اينساني سيياستي نين آچيق و قاپالي يؤنلريني ايچ ائتمگي باجارمالي و ميللي آزادليق ساواشيميزين يؤنونو بو حدفين-يني ايراني مرکز توتان فارس دوشونجه سيستئمينه اساسلانان رئژيمين دارماداغين ائديلمه سينه يؤنلتمه ليگيک.

دوشمن سؤزونو ايشلتمک ايسته مزديم، لاکين پانيرانيستلر بيزي دوشمن اولاراق نيتلنديرديکلري اوچون ايستر-ايسته مز دوشمن مؤوقئييندن چيخيش ائتديکلريني سوبوت ائتميشديرلر و دوشمنه دوشمن کيمي باخماقدا نه يازيق کي قاچينيلمازدير. بو پان ايرانيزم-پانفارسيزم قوللوقچولارين بيز گونئي آذربايجان تورک ميلتينه قارشي مقصدلي اولاراق سورکلي صورتده يوروتدوکلري دؤولت اهميتلي ستراتئژيسي ندير سوالينا جاواب اولاراق کونکرئت شکيلده بيلديريلمه ليدير کي، مؤوجود رئژيم سلفي اولان پهلوي سولاله سي رئژيمي کيمي بير قايدا اولاراق بيز تورکلري بير هوقوقلو ميلت اولاراق تانيمير ، حتّی تانيماق بئله ايستمير، بيزي يئرلي خالق حساب ائتمير، کؤچري ، وحشي و گلمه پارازيت-موزاهيم کوتله حساب ائدير و هر طرفلي محروميتده ساخلانيلماغيميزي طبيعي قايدا قبول ائدير و بو چيرکين سيياستين يورودولمه سينده ايسه اؤزونو تام هوقوقلو وا هاقلي حساب ائدير. مؤوجود رئژيم بيزي منن محو ائتمکده (ئتنوسيد) قرارليدير، بونون اوچون ده بيزي ميللي مدنيت اساسي ايسه ميللي ديليميزدن محروم ائتمکله هؤوويتسيزلشديرمک و مانقورتلاشديرماق ايستگينده تام قرارلي اولدوغونو بو غئيري-اينساني سيياستي دؤولتين داخيلي دؤولت ستراتئژيسينه چئويرمه سي ايله سوبوت ائتميشدير.وه بو ايستيقامتده بوتون واسيطلتدن او جومله دن ايقتيصادي محروميت کيمي ايجتيماي فلاکتلري تاکتيک اولاراق تطبیق ائدير.

باکي ، مي ۲۰۰۷
آردي وار…