یاشاسین آذربایجان - Long live Azerbaijan

.

آل-وئر، گئد-گل و سياسي ايليشکيلرين چوخالماسيلا، ايران بير ميلت اولاراق آدلانديريلدي! ياني کي، گئنه گونئي ضربه يئدي. بو دورومدا، نه بؤلگه ده اولان گرچک سورونلار يئر آليب، و نه آذربايجان اوچون آرتيريلان ماده لر يئرلشيب. خزر هاقلارينا قاووشمادان، گونئي و قاراباغ الدن گئديب و موتتفيقلر کوسه جک دوروما دوشوبلر. روسيه آ.ب.ش-ا بوينوز گؤسترمک اؤچون٫ بيزي قوللانير.

---

---

بير آتا سؤزو بئله دئيير: اوجا آدامين عاغلي توپوغوندا اولار.

خزرياني اولکه لرين توپلانتيسي سونا گلدي، سونوجسا هيچ بير شئي اولمادي!

ايرانين بو گونکو دورومونا باخان هر کس بيلر کي خزر اوچون توپلانتي قورماغ بير باهانه دير کي ايران اؤزونه موتتفيق توپلاسين.

روسيه ايله ايران آراسيندا اولان آليش وئريشه باش اَين بيزيمکيلرسه، بو توپلانتيدا اويناديلار.

گونلر پوتين پوتين دئين ايران حاکيمييتي و مديالار، يوزده بير بيله او بيري پرئزيدئنتلره واخت آييرماديلار. جناب پوتين ايله ايلگيله نن ايران پرئزيدئنتي، اونونلا نه اويون حاضيرلاديقلارين آيدينلاشديردي.

ايران چوخ آغير دورومدادير. اولوسلار آراسي باغلانتيلاري قوپماغ اوزره دير و هر آن آ.ب.ش يا اسرائيل سالديريسينا معروض قالا بيلير. بو ايش بئله قولاي اولماسادا، تهلوکه سي آچيق آشکار هيس اولونور.

ايران اوچون بو چيخمازدان قاچمانين يولو، يئني موتتفيقلر تاپماغ، و ان اؤنمليسي بؤلگه ده اولان دومينانت گوجله ياخينلشماقدير. ايشته او اوزدن دير کي جناب پوتين بو اويونلاردا باش رولو اوينايير.

بيزيم اوجا آدامسا بو اويونلاردان خبرسيزجه سينه مئيدانا گيرير. داها اؤنجه دفعه لرجه ايران اوچون آبري قازانديران اليئو حاکيميتي، بو دفعه ده اؤز گؤره وين يئرينه يئتيردي. ايراني اينسان هاقلاري پوزان ليسته سيندن چيخاردان اليئو حاکيمييتي، خزرياني اولکه لرين توپلانتيسيندا داها دا چوخ خيدمتده بولوندي.

خزر دنيزي ايللردير کي بير بهانه شکلينه دونوشوب. سووئتلر دؤنمينده بير چوخلو تورک اولکه سي ايشغال اولوناراق رسمن اؤز طبيعي هاقلاريندان اوزاق دوشدولر. بو هاقلاردان بيري خزر دنيزيندن يارارلانماق ايدي. بونا آيري يؤندن باخان روسيه و ايران، تورک اولکه لرينه ياندان گيرن قوناغ کيمين باخيرلار و اونلارين رسمي هاقلارين وئرمه مه يه چاليشيرلار.

گئچن آي ايران يئتکيليلري آذربايجان رئسپوبليکاسي بيزيمدير دييه چيخيش ائتديلر. آذربايجان دئولتي بونا سوسدو و اوتانمازجاسينا ايران پرئزيدئنتين آغيرلادي! آنلاشيلمايان بير شئي وار اورتادا. اودا بودور کي، اگر بيريسي سنين وار اولماغيوا اينانماييب و سني اؤز مالي کيمين بيلير، نئجه سنين اوچون يارارلي اولا بيلير کي؟

ارمنستانا باراژ، کؤرپو، يول، ياناجاق تسيسلري و آلت ياپي تيکينتيلر وئرن ايرانلا، بيزيم تورپاغلارا گؤز تيکن، ايشغال ائدن و سويداشلاريميزي آسيميلاسييا ائدن ايرانلا، بيزيم نه موناسيبتيميز اولا بيلير، يا داها دوغروسو نه موناسيبتيميز اولماليدير؟

بلليدير ان دوغال داورانيش بئله دير کي هر بير اولکه، اؤز قومشولاريلا دوستلوق ايچينده اولماليدير. بو ايش هم ايقتيصادي و هم سوسيال ايلرله مه ساغلايار و بؤلگه نين دورومون تسبيت ائدر.

آما، بيزيم وار اولدوغوموز بؤلگه او بيري بؤلگه لره بنزمير. بوراسي بيزيم تاريخي تورپاغلاريميزين اولدوغو بؤلگه دير. ايلگينج اولان بودور کي، بو بؤلگه ده بيزيم هاقلاريميز قومشولاريميزدان، و حتي قومشو اولمايانلار اليله داها چوخ اليميزدن آلينيب.

آذربايجان آدينا قورولان آذربايجان رئسپوبليکاسي نه ائتمه ليدير؟

بو حاکيمييت گئتديکجه آنتي آذربايجان صفتلارين اورتايا قويور. آذربايجان آدينا چيخيش ائدن بو حاکيمييت، آرتيق ان بؤيوک پارچاميزي، گونئي بؤلومون اؤنوتوب. گونئي ايله ايلگيلنمه ين اليئو حاکيمييتي ايشي بوردا بيتيرمه ييب و حتي گونئيده باش وئرنلري قوزئيده ياشايان سويداشلاريميزدان گيزله ديب و حتي گونئيه قارشي ايشلملر ياپير. اؤرنه يين، مجليسيميزده اولان ايران-آذربايجان دوستلوق جمعييتي، ايران سيياستين يوروده رک، تام گوجويله بيزيم عليه ايميزه چاليشير. آل-وئرلر، ايليشکيلر و چيخيشلار تام آيدينجاسينا گونئي پارچاميزي گؤرمه مزليکدن گلير.

ايران ايچينده يارانان نئچه اؤرگوت بيزه قارشي تبليغات و تخريبات آپارماقدالار. ترورچولاري اؤرگوتله ييب و قوزئيه گؤنده رير. ائرمنيلري دستکله يير. پ.ژ.ا.ک تئرور اؤرگوتونه ايران شيرکتلري طرفيندن سايت آچير. ايران يئتکيليلري نين وئرديگي يارديملارلا درگيلر، قزئتلر ياييلير. ايران NGO-سو آدينا آران تبليغاتلاري آپاريلير. قوزئي آذربايجانا آران آدي وئره رک اوراني بيزدن آيري گؤسترمه يه چاليشيب و تهلوکه لي شکيلده گئنيش چاليشمالار آپارير. قوزئيدن اولان موللالار، موعلليملر، شاعرلر و پروفسورلاري يئمنه ديب، بيزه قارشي چيخيش ائتمه يه تشويق ائدير. و، بونلار هيچ ده گيزلي ده يير. گؤره سن بيزيم اوجا آدام بونلاري آنلامير؟

هر بير فيرساتدان يارارلاناراق اؤز ايستکلرين آذربايجانا تحميل ائدن ايرانلا نه ائتملييک؟

گوجسوز، آسلانان بير حاکيمييت کيمي تانينان اليئو حاکيمييتي ندن آذربايجان ميللي معنافينه صداقتلي اولمور؟ ندن آراز-اين بو تاييندا اولان سويداشلارين اؤلومونه، ايشکنجه سينه و آسيميلاييا اولماسينا گؤز يومور؟ ندن هم روسيه، هم آ.ب.ش، هم ايران، هم اسرائيل و اينانيلمازجاسينا ائرمنيستانا يؤنه ليک چاليشير؟

سون زامانلاردا گونئيه او قدر آچيق ضربه لر وورولوب کي اليئو حاکيمييتينه اولان شوبهه لر کئسين فاکتلارا دونوشوب. دونيا دئولتلري بير آز دا اولسا بيزيمله ايلگيلنديکلري وار، ان آزيندان بير نئچه اروپا اولکه سينده بيزيم لهيميزه بياناتلار وئريليب، اولوسلاراراسي باغيش اؤرگوتو بيزيم سياسي مهبوسلارلا ايلگيله نيب. آما، آذربايجان رئسپوبليکاسي آدينا هيچ بير سس چيخماييب. حتي، آلديغيم بيلگيلر بونو گؤسترير کي حاکيمييت بير نئچه غئيري رسمي چيخيشلاري اؤنله ييب و مئديالارا اوياري وئريب!

آذربايجان اينديکي دورومدان تام اولاراق قازانا بيله جک يئرده دير. بئله کي، ايران و روسيه ايستکلرينه قارشي دوروب، ناتو وارليغيلا، عراقدا اولما وضعييتيله، آ.ب.ش ايليشکيلريله و اسرائيل ايشتيراکيلا، آذربايجاندا ايران اليله يارانان تروريست و ايسلامي اؤرگوتلر، بؤلگه ده اولان باسقيلار و قورخولاري دنگله يه بيلير.

آذربايجان گرکدير کي بو دورومدان يارارلانيب، قاراباغ، گونئي، کرکوک، چچن، دوغو تورکوستان و دين، کورد و ائرمني تئرورو مسئله سين ماسايا چيخارتسين. بئله ليکله، اؤز هاقلاريميزين اونوتولماسين انگلله ييب، بؤلگه ده يارانان گوجلر آراسينا يئرلشيب و اونلارلا بيره-بير ايله ريله يه بيلير.

آذربايجان تام آنلاميندا ۴ يول رولون اويناماقلا، اؤز وارليغين، تاريخي تورپاغين و تورک دونياسين قورويا بيلير. بو وسيله ايله، آذربايجان بير گرچک گوجه بدل اولور و اويونجاق اولماقدان قورتولور. اينديکي آذربايجان قومشو يا اوزاغ اولکه لرين کوکلاسيدير.

آذربايجان آدينا ايش باشينا گلن اليئو ديکتاتورلوغونا گوجلو بير موخاليفت گره کي ر. بو موخاليفتين ايشي چتين اولسادا، ميلتيميز اوچون يارارلي اولا بيلير. آما، اگر بو موخاليفت، داها اؤنجه کي مقاله مده يازديغيم سياستلره اويونجاغ اولوبدورسا، دئمک کي بيزيمده ايشيميز يانيبدير.

خزرياني اولکه لرين توپلانتيسي ايران و روسيه قازانجيله بيتدي. بيزيمکيلره آما، بير يادگاري عکس و اوتانج وئريجي بير خاطيره قالدي. پوتين امپراتورلار کيمين آغيرلانارکن، بيزيمکيلر کيتابين سون صفحه سينده يئر آلديلار. خزر ستاتوسو بللي اولمادي، بؤلگه ده اولان باسقيلار آزالمادي.

آذربايجان پرئزيدئنتي آدينا ايمضا آتان ايلهام اليئو، ايرانين اراضي بوتؤولوگون دستکله دي، و بو ايشله، گونئيه قوزئيدن گلن ياريم يامالاغ دستکلرين اؤنون آلدي. موخاليفت اوچون بير توزاغ حاضيرلادي.

ايرانا سالديري اوچون تورپاغين باشقا اولکه لره وئرمه مک ايمضاسيلا، ايرانين دونيايا ياراتديغي تهلوکه لرينه دستک وئردي و آ.ب.ش قارشيسيندا روسيه دان يانا چيخدي.

آل-وئر، گئد-گل و سياسي ايليشکيلرين چوخالماسيلا، ايران بير ميلت اولاراق آدلانديريلدي! ياني کي، گئنه گونئي ضربه يئدي.

بو دورومدا، نه بؤلگه ده اولان گرچک سورونلار يئر آليب، و نه آذربايجان اوچون آرتيريلان ماده لر يئرلشيب.

دونيانين او باشيندا بير ايجلاس اولورسا، ايسلام دونياسينا اولان اذييتلر قينانير، آما، بو سامميتده، قاراباغ مسئله سي اونوتولدو. اليئو حاکيمييتي بو فيرساتي ده يرلنديرمه دي.

نورمالده خاريجي ايشلر نازيرلري نين ايشي اولان سامميته، پرئزيدئنت سويه سينده گئدن آذربايجان و او بيري تورک اولکه لري، اصلینده جناب پوتين و جناب احمدي نژاد سامميتينه ده ير قازانديرماغ اوچون اورا چاغريلميشديلار. بيزيم عاغيلسيز اوجا آدامسا …

خزر هاقلارينا قاووشمادان، گونئي و قاراباغ الدن گئديب و موتتفيقلر کوسه جک دوروما دوشوبلر. روسيه آ.ب.ش-ا بوينوز گؤسترمک اؤچون٫ بيزي قوللانير.

آذربايجاني بيرلشديرمکدن اوزاقلاشديران موقاويله لر، باطيل اولماليلار.

تبريزلي باي بک
۱۷/۱۰/۲۰۰۷
گلاسگو

، بیر میللتین سسی
پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش کاپانیبدی