یاشاسین آذربایجان - Long live Azerbaijan

.

ميللي بيرليگه چاغيريشلاردا بئله دئييلير: هر کس، هر نه دوشونجه ايله، هر هانچي بير تشکيلات اؤيه سي اولماقدان چکينميه رک بو بيرليگه قاتيلماليدير! منجه بو ايش يعني تام بير کابوس. نئجه اولور کي بئله هرکي هرکي بير تشکيلات بيزه يارارلي اولسون؟ يوخاريدا دئديگيم کيمين، فدرال دوشونجه سي اولان سويداشلاريميز آذربايجانين گله جه يينه اؤنم وئرمه دن ايراني قورويورلار. بو سويداشلارا گلين بير اولاليم دئمه نين نه آنلامي اولاجاق؟

---

---

بيلينن اسکي مودئل دئولتلرين زاماني سوغوشوب. آرتيق يئني دئولتچيليک دؤنمينده ييک.

اسکيلرده دئولت دئديگين بير شخص اولوردو. آدينا شاه، زار، پيغمبر قويوب، بير ميلتي يا بير اولکه ني يؤنه تيردي. سؤزو سؤزدو و امرينه ايطاعت ائتمک واجيب!

آما آرتيق او شاهلاردان، زارلاردان و پيغمبرلردن اثر يوخدور مودئرن دئولتچيليکده.

يئني مدل دئولتچيليکده چوخ قاريشيق بير سيستئمله قارشي قارشييا اولوروق. داها دئولت بير آدام، بير قوروپ يا بير پارتيادان اولوشمور. هر بير ايقتيدارين، ان آزي بير کؤلگه دئولتي يارانماقدادير. بونلارين اؤز ايچلرينده بيله، چوخ چئشيتلي هاوالار چالان داللار واردير.

ايقتيداردا اولان پارتيانين ايچ و ديش ايشلرينه باخان داللاين، ده ييشيک ديالوقلار، ده ييشيک پوليتيکالار و چوخ گيزلي قايناقلاري واردير. يعني کي، اؤنملي بير قونويا، ان آزي ۴ يولدان گيريش ياپارلار. هير بير يول ايسه، بلکي او بيري يوللارلا تام ترس گؤزه گلسين. بو ايشده اؤنملي اولان بير مسئله دير، دئولتين قازانماسي.

عئيني ايش، کؤلگه دئولتده ده يؤروتولور. سيزين بيلديگنيز کيمين، بير قونويا، بللي بير پارتيانين ياخلاشمالاري، تام شاشيرديجي بيله اولا بيلسين.

اؤرنه يين، يئرکؤکو ايله ده يه نک پوليتيکاسين هاميميز بيليريک. بو پوليتيکاني يؤرودن بير پارتيا، بلليدير کي چوخ اؤنملي بير گوجه ساهيبدير و اؤز ايستکلرين الده ائتمک اوچون گوجلو بير تور ياراديب، قورباني هاردان گليرسه، تورا دوشموش ساييلير. و اوندان داها اؤنمليسي بودور کي بو ايشلر يالقيز بير اولکه نين آدينا ياپيلير! ياني کي، ايقتيدار يا موخاليفت، بو دال يا او دال، هاميسي بير هدفه دوغرو ايلرله ييرلر.

آما، مع الاسف، بيزيم پوليتيکاچيلار، هله بو ايشه باشلاميش ده ييرلر، و يا حتي، اونو آنلاميش بيله گؤرونمورلر!

آذربايجاندا، خوصوصيله گونئي آدينا چاليشان پوليتيکاچيلار ان اؤنملي نوختايي اونوتموش کيمين داورانيرلار. آذربايجاني الده ائتمه دن، اونا يول چيزيرلر!

بيزيم دوروم آرتيق پارتلاما زامانينا چاتميشدير. اينديکي دؤنم، بيزيم اوچون اؤلوم-ياشام موجاديله سينين تام سونلارين يانسيتماقدادير. يارارلانماق اوچون، ديقتلي اولماق لازيمدير. ياشايا بيليريک، اؤله ده بيليريک!

منيم ان باشدان، فدراليسمه اينانديغيم اولماييب. فدراليسمين بيزه وئرديگي و بيزدن آلديغي وارليقلار، عئيني اينديکي حاليميزدير. يالقيز، آد ده ييشه جک. فارس سؤمورگه چيليگي اولاجاق فدرال ايران. ايندي، بو ايشه بويون ئه ين، بو يولو رکلام ائدن، بو يولدا ساواشان و قوروم قورانلارين بيزيمله نه ايلگيلري اولا بيلير؟

آذربايجان آدينا بير چوخلو قوروم قورولوب. هاميسي آز يا چوخ ايشلر گؤروب و اؤزلرين وار سانيبلار. آما، اصلینده، الده ائده جکلرينه وارمادان داغيليب، توکه نيب و اونوتولوبلار. ندن؟ چونکو نه ايسته ديکلرين بيلمه ييبلر.

آذربايجان اؤزگور اولمايينجا، بو قوروملارين هيچ بيري دوغرو دوزگون يارار وئره بيلميه جکلر.

بير زامانلاردير کي آذربايجاندا تشکيلاتلانما سؤزو مئيدانا گيريب. بو ان اؤنملي ايشدير کي بو دؤنمده ياپيلماليدير. يعني کي، آذربايجاندا بير يا ايکي گوجلو تشکيلات يارانماليدير.

آما، بو تشکيلاتلار ندن و کيمينله يارانماليديرلار؟ طبيعي کي، قورتولوشون اؤنه ميني بيلن، آذربايجاني تانييانلار و آذربايجاني سئونلردن.

بير چوخ سويداشيميز و تانيديغيميز فعال، بيرلشمه يولونا گيرميش ساييليرلار. بو سويداشلارين آماجي، داغاناق اولان گوجلريميزين بير آرايا توپلانماسيدير. بو ايش، اولدوقجا آلقيشلانماليدير.

آما يازيق کي ايشين کؤتو يؤنلري اؤنه مسنمه ييبدير و ان اؤنمليسي، سياسي دوشونجه نين اونوتولماسيدير.

ميللي بيرليگه چاغيريشلاردا بئله دئييلير: هر کس، هر نه دوشونجه ايله، هر هانچي بير تشکيلات اؤيه سي اولماقدان چکينميه رک بو بيرليگه قاتيلماليدير! منجه بو ايش يعني تام بير کابوس.

نئجه اولور کي بئله هرکي هرکي بير تشکيلات بيزه يارارلي اولسون؟

يوخاريدا دئديگيم کيمين، فدرال دوشونجه سي اولان سويداشلاريميز آذربايجانين گله جه يينه اؤنم وئرمه دن ايراني قورويورلار. بو سويداشلارا گلين بير اولاليم دئمه نين نه آنلامي اولاجاق؟

منيم زامانلار اؤنجه اؤنرديگيم بير يول اولوبدور٫ حالا او اينانجدايام. آذربايجاني قورتاراجاق اولان يالقيز بير يول وار و اودا ميللي اينانجا صاحيب اولان بير پارتيانين يارانماسيدير. بو پارتيادا عيرقچيليق ده يير، ميلتچيليک ياشاياجاق.

هر ميلت کيمين، بيزيمده چئشيتلي قاتلاريميز واردير. هر اينانجدان، هر رنگدن و هر بؤلگه دن چشيتلي چئشيتلي اينسانلاريميز وار. بونلارين بير ائکسيکلري واردير کي اودا وطندير.

وطنيميز بيزيم اليميزده ده يير. من بئله اينانيرام کي اؤنجه وطن اؤزگور اولماليدير، داها سونرا اونو يؤنتمک يؤنتملري تارتيشيلمالي.

فارس-ايرانچيلارين سسي يوکسلمکده دير. هر گون يئني بير توپلانتي، يئني بير پيلان و يئني بير اورتاق بولورلار. بيز آما، هله بوش بيرليک ياراتماغلا اوغراشيريک! زامانسا، گئچيب گئدير! ساواشسا، اؤلوم-ياشام ساواشيدير.

بيزي بيرليگه چاغيران سس يالقيز وطن و اؤزگورلوکدور. باشقا يوللار جايديريجي، قوندارما و دوشمن يولودور.

سيزجه بيزيم گله جک اوچون ياراناجاق اولان دئولتيميزين، چئشيتلي داللاري، اينانجلي آذربايجانليلاري و گوجلو کؤلگه سي وار مي؟

بيزيم بيرليگيميز ميللي بيرليک اولماليدير، قارماشا بازاري يوخ!

تبريزلي باي بک
۱۴/۱۰/۲۰۰۷
گلاسگو

، بیر میللتین سسی
پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش کاپانیبدی