کيهان باش رئداکتورو ايران ليدئري آيت الله خامنه اي نين امريله بحرين و آذربايجانا اراضي ادعاسي ائديب!

بای بک، آذربایجان | آراگؤن, ۱۳-ي زومار آی , ۱۱۰۰۷ اینجی ایل, چولا ۲۳:۰۵ | بای بک, تورکجه, مقاله

بو اولايلاري آردي آردينا دوزه رک بير سونوجا وارا بيليريک. ايران آدلانان اؤلکه ده حاکيمييت و گوج فارسلارين الينده دير آنجاق بير سيرا فارس اولمايان کوکلا (اويونجاق) مقاملاردا اوتوروبلار. ايران سيياستي بو گون اؤز سينيرلاريندان ائشيکده اويقولانير. بحرين بو سيياسته يوخ دئدي آما قوزئي آذربايجان حاکيمييتي يوز فاييز (۱۰۰٪) بو سيياستي دستکله دي. داها اؤنجه ايراني اينسان هاقلاري پوزان محکمه سينده ساوونان و اونو قارا ليسته دن چيخارتديران اليئو دئولتي، تام آنلاميندا ميلته و تورپاغا خيانت ائتمکده دير. آرتيريم کي آذربايجان سينيرلاريندا ياخالانان ارمني سيلاهلي عسکرلر ايران وطنداشي و ايراندا ائييتيم گؤرموش تانيتيليبلار. بو او حالده دير کي ايران رسمن آذربايجانين ايشغال اولونموش تورپاغلاريندا سئپاراتچي رئژيمه تيکينتي تيکير و ياناجاقلا يئمک وئرير، همده پول آلمادان!

ياخلاشيق بير آي بودان اول، آيت الله خامنه اي ايله کيهان مسئوللاري آراسيندا گيزلي بير گؤروش گئچيريليب.

يئتيشن بيلگيلره گؤره، بو گؤروشده آيت الله خامنه اي تماميله کيهاندا يازيلانلاري و اونون باش رئداکتورونون چيخيشلاريني دستکله ديگيني بيلديريب. آيت الله خامنه اي بو قزئتين يئني سيياستلريني آچيقلاديقدان سونرا آرتيريب کي کيهان ايشچيلري حاکيمييت طرفيندن قورونماغا دوام ائديب و اؤز ايشلرينده سربست قالاجاقلار.

نئچه گون بو گؤروشدن سونرا، کيهان باش رئداکتورو حسين شريعتمداري بير مقاله يازاراق بحرين اولکه سي نين ايرانا عايد اولدوغونو، همده اورانين ايرانا قايتاريلمالي اولدوغونو وورقولاييب. بو مقاله بؤيوک قالماقالا ندن اولور و ائلچيليک سويه سينده ناراضيليق تؤره دير.

بحرين حاکيمييتي و ميلتي٫ ايران دئولتي قزئتينده يايينلانان بو يازييا رئاکسييا وئرب و گئنيش شکيلده پيکئت گئچيرديلر. ايران دئولتي مجبورن بو يازي نين شخصي دوشونجه اولدوغونو بيلديره رک، خاريجي ايشلر نازيريني بحرينه سفربر ائدير.

همن بو اولايدان سونرا، باشقا بير گيزلي گؤروش حاياتا گئچير. بو گؤروشدن سونرا، بو دفعه حسين شريعتمداري تلويزيون چيخيشيندا آذربايجان جمهوريسينه ساتاشير. آذربايجانا شمالي ايران آدي وئرن پان يرانيست سيياستچيلرين باشيندا گلن جناب شريعتمداري، قافقازلاردا ۱۷ رايونون ايرانا عايد اولمالاريني دئييب و اونلاري آنا وطنلرينه! ياني ايران-ا قايتاريلمالاريني ايسته يير.

بو اولاي آما چوخ شوبهه لي اولاراق قوزئي آذربايجان حاکيمييتي، هابئله ميلت طرفيندن سسسيز قالير. دانيشيقلاردان نئچه گون سونرا آذربايجانا سفر ائدن ايران پرئزيدئنتي، ايلهام اليئو طرفيندن سيجاق قارشيلانير و قارداش آدينا ايفتيخارلانديريلير!

بو دؤنمده ايران حاکيمييتينده باش وئرن ده ييشيکليکلر بيزيم ميللي ماراخلارلا توققوشماقدادير. ايران ليدئري بير تورک دور ده ين پانيرانيستلر، بو سفر داها بير اويون اويناماغا باشلاييبلار. آدي تورک اولان آما اؤزو فارس نؤکري وظيفه سينده اولان آيت الله خامنه اي٫ فارس ديلينه وئرديگي اؤنم، فارس شيعه چيليگينه گؤسترديگي اؤزن و آنتي-آذربايجان چيخيشلاريلا تام آچيقجاسينا آذربايجان ميلتي و مدنييتينه قارشيدير.

بو آرادا آما باشقا بير اؤنملي ايش وار. دونيايا ياييلان سيستئمده، ايران حاکيمييتي يالقيز و يالقيز ولايت-فقيه الينده دير. بو مقام ايسه بير تورک اولان موللايا وئريليب، ماراخلي بو کي ايراندا اولان چوخونلوقدا تورکلرديلر!. ياني بو ايش فارس شووونيسمي نين دئموکراسي آدييلا اويناماسيدير. بئله کي نئچه فارس اولمايان، آنجاق فارس نؤکري اولان مقام ياراتاراق ميلتلرين اعتيراضينا قارشيليق وئرمک ايسته ييرلر.

حاکيمييتي گرچکده کنترل ائدن، نيظام مصلحتلريني تانيتان بير کوميته دير. اونون باشينداسا اکبر هاشمي رفسنجاني وار، بو آدام فارس شووونيسمي نين آتالاريندان ساييلير. جناب رفسجاني ايران کولتور شوراسي نين رئيسيدير کي او شورادا يالقيز فارس نوماينده لر اؤيدير. بو شورانين ياپديقي ايشلردن بيري آذربايجاندا تورکجه آدلارين فارسجايا چئوريلمه امري وئرمکدير.

بو گون باشقا بير ده ييشيکليک يارانيب. ايران ايسلام حاکيمييتينده ان اؤنملي مقاملاردان اولان خبرگان-مجليسي (علمالار شوراسي) باشخانليغيدير. بو مقام ايسه اکبر هاشمي رفسنجانيه وئريلدي! بو موللا نچه ايللردير کي بئله بير مقام پئشينده دير. خبرگان-مجليسي باشيندا اولان جناب رفسنجاني، بو گون ليدر آدلانان آيت الله خامنه اي-دن داها باش دير و ائله بير سوييه ده دير کي ليدئرليک مقاميني ايشدن آتا بيلير.

دؤشمنين تانيمايان آرادان گئتمه يه محکومدور

تبريزلي باي بک
۰۴/۰۹/۲۰۰۷
گلاسگو