یاشاسین آذربایجان - Long live Azerbaijan

.

- اورتاق يورد و توپراق: ايراندا تورک خالقي اوچون گونئي آزربايجان، قاشقاي يورد و آفشار يورد. - اورتاق اردم، گله نه ک و گٶره نه کلر: آشيق کويو (موزييي) و تورک سٶزگٶرکو (ادبيياتي)، اولوسال سٶيله نجه و بويلار (اوغوز خاقان، دده قورقود، کوراغلو، اصلي کرم، …)، خيديرنبي بايرامي، اولوسال پالتارلار (قافقاز پالتارلاري، اويماقلاريميزين پالتارلاري شاهسئوه ن، قاشقاي،…)، قادين- ارکک ائشيتلييي،.. ، - اورتاق سيياسي اٶته ک (تاريخ): باي بک باشقالديريسي، تورک دٶولتلري اٶزه لليکله آزربايجان مرکزلي اولان قاراقويونلو، آغ قويونلو، آزربايجان آتابکلري،… آزربايجان مشروطه اينقيلابي، آزاديستان حرکتي، ميللي حٶکومت، خالق-ي موسلمان حرکتي، هاراي من تورکه م باشقالديريسي - اورتاق دين و اينانج آنلاييشي: تورک جعفريليک فارس ايمامي شيعه لييه قارشيليق، تورک قيزيلباشليق کورد اهل-حقه قارشيليق، سئکولار اولان تورک خالق ايسلامي. - اورتاق

---

---

يوخاريداکي بايراق، گونئي آزربايجاني ايچه ريده، ديشاريدا، سيياسي، ايجتيماعي و عئلمي موناسيبتلرده اولدوقجا ياخچي شکيلده تمثيل ائده جک اويقون بير بايراقدير. بو بايراغين تمل اوچ اٶزه للييي “قوزئي آزربايجان بايراغي ايله عئيني اولماماقلا بيرليکده، اوندان اولابيله جک قده ر آز فرقلي اولماق”، “گونئي آزربايجانين دئوريمچي و اٶنچو سيياسي کيمليييني تمثيل ائتمک” و “تورکييه و تورکمان ائلي بايراقلارينا ياخينلاشماق”دير.
بايراق ميللتي يارادار، ميللت دٶولتي

اولوسال کيمليک بير توپلومو بير ياندان اٶز ايچينده بيرله شديريره ره ک، باشقا بير ياندان دا اٶته کي توپلوملاردان آييران اٶزه لليکلر و آيريليقلاردير. آشاغيدا سيرالانميش بو اٶزه لليکلر اولوسو يارادان اٶزه لليکلرله عئينيدير:

- اورتاق ديل و اورتاق يازي: تورک ديلي و تورک لاتين يازيسي.

- اورتاق يورد و توپراق: ايراندا تورک خالقي اوچون گونئي آزربايجان، قاشقاي يورد و آفشار يورد.

- اورتاق اردم، گله نه ک و گٶره نه کلر: آشيق کويو (موزييي) و تورک سٶزگٶرکو (ادبيياتي)، اولوسال سٶيله نجه و بويلار (اوغوز خاقان، دده قورقود، کوراغلو، اصلي کرم، …)، خيديرنبي بايرامي، اولوسال پالتارلار (قافقاز پالتارلاري، اويماقلاريميزين پالتارلاري شاهسئوه ن، قاشقاي،…)، قادين- ارکک ائشيتلييي،.. ،

- اورتاق سيياسي اٶته ک (تاريخ): باي بک باشقالديريسي، تورک دٶولتلري اٶزه لليکله آزربايجان مرکزلي اولان قاراقويونلو، آغ قويونلو، آزربايجان آتابکلري،… آزربايجان مشروطه اينقيلابي، آزاديستان حرکتي، ميللي حٶکومت، خالق-ي موسلمان حرکتي، هاراي من تورکه م باشقالديريسي

- اورتاق دين و اينانج آنلاييشي: تورک جعفريليک فارس ايمامي شيعه لييه قارشيليق، تورک قيزيلباشليق کورد اهل-حقه قارشيليق، سئکولار اولان تورک خالق ايسلامي.

- اورتاق مدني قوروملار:

- اورتاق اٶلچو و بيريملر: تورکجه يئدديجه (هفته) گونلري، آيلار، دٶنه نجه لر (فصللر) و اون ايکي ايلخيلي (حئيوانلي) تورک ييمي (تقويمي)…

- اورتاق اولوسال بايراق و آييتيم (سرود).

١- ايراندا تورک خالقينين ياشاديغي بٶلگه لري، مدني و سيياسي آلانلاردا، اٶزه ل تاريخي کيملييه صاحيب بير ائتنيک بيريم اولاراق تمثيل ائده جک بايراقلارا گره ک واردير.

٢- بئله بير بايراغي اوموقلاماق (دسته کله مک) لوزومن فئدئراليست و يا ايستيقلالچي اولماق آنلامينا گلمه ز. ايسته فئدئراليست، ايسته ر ايستيقلالچي، ايسته ر بونلارين هئچ بيرينه اينانمايان، آنجاق تورک خالقي و ياشاديغي بٶلگه لرين اٶزه ل و اٶزگون مدني، ائتنيک و تاريخي کيميلييه صاحيب اولدوغونا اينانان هر کس، بئله بير بايراغي اوموقلامالي و اونو منيمسه مه ليدير.

٣- ميللي بايراغين وارليغي، آيريجا تورک خالقي و بٶلگه لريني اٶز ميللي حاقلاريني الده ائتمه اوغرونداکي اوزون سيياسي ساواشيم سوره جيينده و دٶولتله شمه سيراسيندا تمثيل ائتمک آچيسيندان دا گره کليدير. بو گره کسينيم، سون دٶنه مده اٶلکه ايچي و ديشيندا، بوتون گٶسته ري، يورويوش، توپلانتي، اوتوروم و ائيله ملرده و ان سون گوئني آزربايجانين يو.ائن.پي.او′دا تمثيل ائديلمه سي سوره جينده گٶزلر اٶنونه سريلميشدير.

۴- اٶلکه ايچي و ديشيندا چوخ ساييدا گونئيلي شخص و قورومون، دوغرودان گونئي آزربايجاني تمثيل ائده جک بايراق ياراتما ايشينه قالخيشماسي، بئله بير ائحتيياجين وارليغينين ان آچيق گٶسته رگه سيدير.

۵- دولاييسي ايله اينديکي دورومدا گونئي آزربايجاني تمثيل ائده جک بير بايراغا گره ک اولماديغيني ساوونانلارين (گوناسکام و بير سيرا شخصييتلرين (گونتاي گنج آلپ…) گٶروشلري دوزگون دئييلدير.

بايراق سورونو، دٶولتله شمه سورونو دئييلدير، ميللتله شمه سورونودور

١- گونئي آزربايجانين اولوسال بايراغيني بيلرله مه سورونو، گونئيين موستقيل و يا فئدئرال اولماسينا، يا دا گونئي آزربايجانين اٶز دٶولتيني قوروب اٶز ميللي مجليسي-پارلامئنتيني ياراداندان سونرايا بيراخيلابيلمه ز. چونکو اولوسال و يا ميللي بايراق آديندان دا بللي اولدوغو کيمي ميللت و اولوسلا ايلگيليدير، دٶولتله يوخ.
٢- موستقيل و يا فئدئرال اولما، دٶولت ياراتما و يا مجليس قورما هاميسي ميللتله شمه دن سونرا گله ن دٶولتله شمه آشاماسي ايله ايلگيلي قونولاردير. حالبوکي تورک خالقي و گونئي آزربايجاني تمثيل ائده جک بايراغا قاووشما، اوندان داها اٶنجه کي آشاما يعني ميللتله شمه ايله ايلگيليدير.

٣- بيزيم کيمي دٶولتسيز ميللتلرده، ميللتله شمه دٶولتله شمه نين سونوجو دئييلدير، بلکه ترسي يعني دٶولتله شمه ميللتله شمه ميزين سونوجودور. بو گئرچه يي بئله ده ديلله نديره بيله ريک: بيزيم ميللتيميز و بايراغيميزي دٶولتيميز ياراتماياجاق، دٶولتيميزي ميللتيميز و بايراغيميز ياراداجاقدير. زامان آچيسيندان دٶولتله شمه دن اٶنجه گله ن اولوس و بايراق، قارشيليقلي بيچيمده بير بيري ايله باغلانتيليدير. اولوسلاشمادا ايله رله مه ميز، بايراق ائحتيياجيني دوغورور و بايراغين منيمسه نمه سي اولوسلاشماغيميزي سورعتله نديرير. دولاييسي ايله تورک خالقي و گونئي آزربايجانين اٶز اولوسال بايراغينا قاووشماسي، هم خالقيميزين ميللتله شمه سينه سورعت وئره جک هم ده خالقيميزي دٶولتله شمه يه بير آدديم داها ياخينلاشديراجاقدير.

۴- بيز دٶولتي اولمايان بير ميللتيک. بونون آنلامي، آديندان بللي اولدوغو تکين، دٶولت و اونون قوروملارينا، بو آرادا اولوسال مجليسيميزه صاحيب اولماديغيميزدير. بئله نچي ميللتلر ايسه، يعني دٶولتسيز ميللتلر، ميللي کيمليک و ميللي باغيمسيزليق موجاديله لريني و بو يولدا گره که ن هر شئيي، او جومله دن بايراق کيمي سمبوللارين سئچيميني وار اولمايان و نه زامان وار اولاجاغي دا بللي اولمايان دٶولتلرينين ياراديلماسينا قوشوللانديرانمازلار.

۵- گونئي آزربايجانين اٶز دٶولت و پارلامئنتيني يارادابيلمه سي، آچيلان گله جه يين، بوگونون يارينين ايشي دئييلدير، بو اولکونون گئرچه کله شديريلمه سي بلکي اونلارجا ايل و قوشاق گره کديره جکدير. بيز دوروموموزدا اولان دٶولتسيز ميللتلر، اٶز سورونلارينين چٶزومونو، نه واخت و نه زامان قاووشاجاقلاري بللي اولمايان اٶز دٶولتلرينين ياراديلماسيندان سونرايا بيراخابيلمه زلر.

۶- دٶولت و مجليس تکجه وار اولان ميللي بايراغي رسميله شديريب اونا قانوني بير ايستاتو وئره ر، آنجاق بايراغين اٶزونو ياراتماز. دونيانين چاغداش سيياسي عورفوندا دا بو بئله دير. يعني مجليسين ياپاجاغي تک ايش، بو و يا باشقا شکيللرله تورک خالقي و گونئيي تمثيل ائده ن و يا ائتمه يه حاق قازانميش بير بايراغي، ياسالارلا قانوني و رسميله شديرمکدير، مجليسين ايشي يئني بير بايراق ياراتماق دئييلدير. بو يول و يٶنته م، تورکييه و آزربايجان جومهورييتلري بايراقلارينين رسمي و ياساللاشديريلماسيندا، و نه ياراتيلماسيندا، ايزله نه ن يول اولموشدور.

٧- دونيانين چاغداش سيياسي عورفونده ده بئله بير شئي يوخدور. فيليسطين دٶولتي اولماديغي حالدا، فيليسطيني (خالقي، يوردونو) تمثيل ائده ن بايراق واردير. قونشولوغوموزدا کوردوستان دٶولتي اولماديغي حالدا اينديدن بو خالقي، يوردو و گله جکده قورولماق ايسته نيله ن کوردوستان دٶولتيني تمثيل ائده ن- اوزون سوره دن بري- کوردوستان بايراقلاري واردير.

٨- دولاييسي ايله تورک خالقي و گونئي آزربايجاني تمثيل ائده جک بايراغين سئچيميني، بليرسيز بير گله جکده آزربايجان دٶولتي يارانيب و ميللي مجليس قورولدوقدان سونرايا آتانلارين توتومو (آزربايجان فئدئرال دئموکرات حرکتي، … ) سيياسي آچيدان دوزگون دئييلدير.

اوغورلانان ياتاي آل، آغ، ياشيل شريد و آسلان –گونش- قيليج اوچلوسو

١- ايران بايراغي (اوچ ياتاي آل، آغ، ياشيل شريد و اورتاداکي آسلان –گونش- قيليج سمبولو) کٶکه ن اولاراق تورک خالقي و آزربايجانا عاييددير

٢- آنجاق قاجار تورک-آزربايجان دٶولتي ييخيلاندان سونرا و آردينجا تورک خالقي و آيدينلارينين يوز ايلليک درين بير يوخويا دالديقلاري ييرمينجي يوزايلده اوز وئره ن اولايلار نده ني ايله، بو بايراق گونوموزده هم ايران، هم بٶلگه و هم دونيادا ايرانليليق و فارسليق سمبولونا چئوريلميش و ائله جه تانينميشدير:

بوگونکو سيياسي عورفده ياتاي آل-آغ-ياشيل شريدلر ايرانليليغي (ايران ديلليليک، ايران سويلولوق) تمثيل ائدير. بو اوزدن بو شريدلر عئينن ايران ديللي خالقلارا منسوب اولان تاجيکلر و کوردلر طرفيندن ده اٶز ميللي بايراقلاريندا منيمسه نميشدير.

بوگونکو سيياسي عورفده آسلان، گونه ش و قيليج اوچلوسو، فارس و پرس شاهليغيني تمثيل ائدير. دولاييسي ايله بو آرم، بوتون فارس ميللييتچيلري طرفيندن، باشدا سلطنت طلبلر و مجاهدين اولماق اوزره، اٶز بايراقلاريندا منيمسه نميشدير.

٣- يوخاريدا سٶيله نه نلره داياراق، اٶنه ريله ن و گونئي آزربايجاني تمثيل ائده جک بايراق، ايران دٶولتي بايراغيندان (اوچ آل، آغ، ياشيل شريد؛ آسلان، گونه ش، قيليج اوچلوسو) فرقلي اولماليدير.

۴- دولاييسي ايله آزربايجان دئموکرات فيرقه سي و باشقا بير سيرا شخصييتيميزين (فدائي…..) اٶنه رديکلري بايراقلاردا، آرتيق ايله ري درجه ده ايرانلي-فارسلاشان بو اوچ بويالي شريدلري عئينن منيمسه مه لري، دوزگون بير توتوم دئييلدير.

آزربايجان جومهورييتينين بايراغي، گونئيي تمثيل ائده بيلمه ز

١- گونئي اوچون اٶنه ريله ن بايراق، قوزئي آزربايجان بايراغيندان فرقلي اولماليدير. اساسن اٶلکه ايچي و ديشيندا چوخ ساييدا گونئيلي شخص و قورومون، گونئي آزربايجاني تمثيل ائده جک بايراق ياراتماغا تشببوث ائتمه سي، حتتا بو ايشي گونئي آزربايجان دٶولتينين قورولماسيندان سونرايا حواله ائتمه ري بئله، آزربايجان جومهورييتي بايراغينين گونئييي تمثيل ائتمه ديينه اينانماغين سونوجودور.

٢- پيرينسيب اولاراق قوزئي آزربايجان بايراغي، سيياسي آچيدان قوزئي آزربايجانين اٶزونه خاص اولان ياخين تاريخي، دٶولتله شمه سوره جي و سيياسي کيمليييني تمثيل ائدير. گونئي آزربايجانين اٶزونه خاص و قوزئيدن فرقلي بير ياخين تاريخي، دٶولتله شمه سوره جي و سيياسي کيملييي اولدوغو اوچون، قوزئيده و قوزئيليلر طرفيندن اولوشدورولان آزربايجان جومهورييتينين بايراغي، گونئيين بايراغي اولابيلمه ز.

٣- آزربايجان جومهورييتنين بايراغيني گونئي آزربايجان بايراغي دييه قوللانماق، بير سيرا حوقوقي کيمليک پيرتلاشيقليغا، بو ايکي سيياسي، مدني و تاريخي بيريم و وارليغين سيياست دونياسيندا بير بيرينه قاريشماسينا يول آچار.

۴- گونئيده آپاريلان چتين اولوسال ساواشيمدا، قوزئي بايراغينين گنجلر طرفيندن قالديريلماسي، گونئيده جريان ائتمکده اولان ميللي قورتولوش ساواشيميني هم ايچه ريده و هم دونيادا باشقا بير اٶلکه يه باغلي، باشقا بير دٶولتدن آسيلي اولان بير حرکت کيمي گٶسته ره ر، آيريجا بو بايراغي قالديران گنجلره جاسوس مارکي ووردوروب، اونلاري اولدوقجا آغير بير هزينه اٶده مه يه مجبور ائده ر.

۵- قوزئي آزربايجان بايراغينين، بوتٶو آزربايجاني تمثيل ائتمه سي ده تارتيشماغا آچيق بير قونودور. بوتٶو آزربايجان و بايراغي، قوزئي و گونئيين ائشيت بيچيمينده قاتيليمي ايله اورتايا چيخماليدير. اينديدن نه قوزئين بايراغي و نه ده گونئين بايراغي، تک باشينا کسينله شميش بوتٶو آزربايجانين بايراغي دييه سونولماماليدير.

۶- قوزئيليلرين باشدا ائلچي به ي کيمي شخصيتلريميزين منيمسه دييي قوزئيين بايراغي گونئيه داشيناجاقدير دوشونجه سي دوزگون بير دوشونجه دئييلدير. قوزي آزربايجانليلارين آزربايجانين بٶلوندويو و گونئيين سورونلارينين و اونلارين چٶزومونون ده گونئيليلرين سوروملوغوندا اولدوغو گئرچه يينه سايقي گٶسته رمه ليديرلر. دولاييسي ايله آزربايجان جومهورييتي بايراغينين عئينن گونئيين ده بايراغي اولدوغونو تبليغ ائده نلرين (گون آز تي وي، آراس اوغلو، آزربايجان جومهورييتدن چوخ ساييدا شخصين) توتومو دوزگون دئييلدير

گونئي آزربايجان بايراغي- تمل قاوراملار

١- ايراندا تورک خالقينين ياشاديغي و گله جکده موستقيل و يا اٶز ارک (اوتونوم) ايستاتوسو قازانما شانسي اولان هر بير بٶلگه يه بيره ر آيري بايراق گره کليدير. بو دورمودا ايراندا تورک ميللي دئموکراتيک ترپه نيشينه، تورک بٶلگه و تورک دٶولتلريني تمثيل ائده جک دٶرد بايراغا، “گونئي آزربايجان”، “قاشقاي يوردو” (گونئي ايراندا ياشايان آزربايجان تورکلري ديياسپوراسينين قوراجاغي دٶولت)، “آفشار يورد” (قوزئي دوغو ايراندا ياشايان خوراسان تورکلري ديياسپوراسينين قوراجاغي دٶولت)، و “خلجيستان” (خلج يورد؟) (گونئي آزربايجان دٶولتينه داخيل اولان خلجلرله مسکون و اوتونوم دٶولت) گره کسينيم واردير.

٢- گونئي آزربايجانين موستقيل سيياسي کيملييني تمثيل ائده جک و تکجه اونا اٶزه ل اولان بيرجه بايراغين قبول ائديلمه سي، عاجيل بير ائحتيياجدير و گئجديريله نمه ز. بو آچيدان “ت.د.پ.” (تورک دئموکراتيک پيلاتفورمو-١٩٩٦ دا)، “گاموح” (گونئي آزربايجان ميللي اويانيش حرکتي)، “گاييپ” (گونئي آزربايجان ايستيقلال پارتيسي) و باشقا قوروم -شخصلرين گونئي آزربايجانا بايراق اٶنه رمه لري اولدوقجا دوزگون و گره کلي بير سيياسي داورانيش اولموشدور.

٣- تورک خالقينا منسوب اولان هر شخص، شخصييت، مدني، ويا سيياسي قوروم و قورولوش، ياشاديغي بٶلگه يه باخيلماقسيزين (گونئي آزربايجان، قاشقاي يورد، آفشار يورد، خلج يورد)، بو بٶلگه لري تمثيل ائده جک بايراقلاري اٶنه رمه حاققينا ماليکدير.

۴- طبيعي اولاراق بايراق اٶنه رمه ده هر بٶلگه اوچون، او بٶلگه ده ياشايان شخص و شخصييتلر و يا او بٶلگه يه باغلي قوروم و قورولوشلارين اٶنجه ليکلري اولماليدير.

۵- ايدئآل اولان ياخلاشيم، هر شخص و قورولوشون اٶنه ريله ن بايراقلار آراسيندان ان چوخ به يه ندييي و اويقون گٶردويو بايراغي اٶز سايت، درگي، تئلئويزييون و باشقا يايينلاردا ايشله تمه سيدير. بئله جه هم خالق بو اٶنه ريله ن بايراقلار و اونلاري ساوونان قوروملارلا تانيش اولار و هم اوزون سوره ده، و زامان ايچينده بير و يا بير نئچه بايراق بونلار آراسيندان اٶنه چيخيب گونئين بايراغي اولما حاققيني قازانار.
ياپيلماماسي گره که ن يانليشليق

١- اٶنه ريله ن بايراق، اولقون، اويقار (مدني)، چاغداش سيياسي تٶره (اخلاق) و دئموکراتيک آنلاييش ايلکه لرينه (پيرينسيبلرينه) سايقي گٶسته ريله ره ک خالقا سونولماليدير.

٢- بيرئيلر (شخصلر) و قورولوشلار، اٶنه رديکلري و اويقون گٶردوکلري بايراق ويا بايراقلاري، عئينن بو شکيلده يعني “اٶنه رديکلري” و يا “اويقون گٶردوکلري” بايراق و يا بايراقلار اولاراق خالق و دونيايا سونمالي و تانيتماليديرلار. هئچ بير شخص و يا قورولوش اٶنه ردييي، به يه ندييي يا دا اويقون گٶردويو بايراغي، کسينله شميش گونئي آزربايجان بايراغي دييه سونمامالي، تانيتمامالي و بئله نچي بير يانيلقييا گيرمکدن جيددي شکيلده اوزاق دورماليدير.

٣- چاغداش مدني سيياسي اخلاقا ترس اولان بو داورانيش، عئيني زاماندا تورک خالقينا و آزربايجانا ان بٶيوک ايهانتدير و تاريخ اٶنونده محکومدور. بئله داورانيشلاردا بولونان شخصلر و قورولوشلار ايفشا ائديلمه ليديرلر.

۴- دولاييسي ايله آنتي دئموکراتيک و سيياسي اخلاق باخيميندان سون درجه يانليش بير بيچيمده سونولان گاموح′ون اٶنه ردييي بايراق قبول ائديله بيلمه ز. بوتشکيلاتين بو قونوداکي آنلاشيلماز توتومو و يئريتدييي گٶرکسوز سيياست، يعني اٶنه ردييي بايراغي گونئي آزربايجانين بايراغي دييه تحميل ائتمه يه قالخيشماسي، بوتونويله يانليش و قبول ائديلمه زدير.

اٶنه ريله ن بايراقلاردا آرانيلماسي گره که ن اٶزه لليکلر

گئچه ن ايللرده گونئي آزربايجان و تورک خالقينين ياشاديغي اٶته کي بٶلگه لر اوچون بير نئچه بايراق اٶنه ريلمشيدير. اٶنه ريله ن بايراقلاردا ان اويقونونو سئچمکده بير نئچه ايلکه يه ايريم (ديققت) ائديلمه ليدير:

١- گونئي آزربايجان بايراغي، اولابيلديکجه قوزئي آزربايجان و تورکييه بايراقلارينا بنزه رليک و اوخشارليغا ماليک و اونلارلا بير بوتونلوک ايچينده اولماليدير. گونئي آزربايجان، قافقاز و آنادولونين کسيشدييي، اٶرتوشدويو بير تورپاق و کيمليکدير. گونئي آزربايجان بير باخيما قافقازين اورتادوغوداکي اوزانتيسي ايسه، باشقا بير باخيمدان دا کيچيک آسيانين اورتادوغوداکي اوزانتيسيدير.

٢- اٶنه ريله ن بايراغين، قوزئي آزربايجان بايراغيندان فرقلي اولماسي گره کدييينه رغمن، گونئي و قوزئي آزربايجان بايراقلاري آراسينداکي فرق اولابيلديکجه آز اولماليدير. بو آچيدان، گاموحون اٶنه ردييي بايراق، آزربايجان جومهورييتي بايراغيندان اساسلي بير بيچيمده فرقلي اولدوغو اوچون، اويقون بير اٶنه ري دئييلدير.

٣- گونئي آزربايجان، قوزئي آزربايجانلا صاحيب اولدوغو باغلار قده ر، تورکييه و دوغو آنادولو ايله ده، ديل، سوي، اينانج، سيياسي تاريخ و …. چئشيدلي باغلارا صاحيبدير. گونئي آزربايجان و ايرانين باشقا بٶلگه لرينده ياشايان خالقين سوي کٶکونو اولوشدوران ائل، اويماق و طايفالارين هاميسينا ياخيني تورکييه تورپاقلاريندان بورايا کٶچ ائتميش طايفالاردير. آيريجا تاريخي و ائتنيک آزربايجانين و هابئله خالقيميزين اٶنه ملي بير بٶلومو تورکييه سينيرلاري ايچينده قالميشدير. دولاييسي ايله گونئين بايراغي، قوزئيله اولدوغو کيمي، تورکييه ايله صاحيب اولدوغو بو چوخ يٶنلو و تاريخي باغ و عئينيلييي ده اٶزونده يانسيتماليدير. بو باخيمدان گاموحون اٶنه ردييي بايراق تورکييه بايراغي ايله هئچ بير اورتاق يٶنو اولماديغيندان دولايي، اويقون بير اٶنه ري دئييلدير.

۴- اٶنه ريله بايراق ائستئتيک باخيميندان يوکسه ک نئجه ليييه ماليک اولماليدير. ائستئتيک آچيدان دوشوک دوزئيلي و ذٶوقسوز اولان اٶنه ريلر قبول ائديله بيلمه ز.

۵- اٶنه ريله ن بايراقلار هر بٶلگه نين (گونئي آزربايجان، قاشقاي يورد، آفشار يورد، خلج يورد) تاريخي و يا سيياسي کيملييي ايله باغلانتيلي اولوب بو آچيلاردان آنلاملي اولماليدير.

اويقون بير بايراق

بو يازينين باشيندا يئر آلان بايراق، سون دٶنه مده بير نئچه اٶيره نجي طرفيندن اٶنه ريلميشدير. بو بايراق وار اولان اٶنه ريلر آراسيندا ان اويقون بايراق کيمي ده يه رله نديريله بيله ر. بو بايراق اوچ شريدلي، ياشيل-آغ-آل بويالاردان اولوشان و آي-اولدوزلو بير بايراقدير. بو بايراقدا قوزئي آزربايجانداکي سککيز بوجاقلي اولدوز يئرينه، بئش بوجاقلي اولدوز يئر آلير:

١- بو بايراقدا اوچ گٶي، آل و ياشيل شريدلر قوزئي آزربايجان بايراغيندا اولان شريدلرله (هم سيرالاري، هم انلري) عئينيدير. بورادا آل (قيرميزي) تورکلوک (اسکي شامان، قيرقيز، اوغوز، قاراخانلي، بايبک، غزنه لي، سلجوقلو، خلج، عوثمانلي، ….. بايراقلاريندا اولدوغو کيمي)، گٶي آوروپا و چاغداشليق (آوروپا بيرلييي بايراغيندا اولدوغو کيمي) و ياشيل ايسلامي گئچميش و تاريخين سمبولودور.

٢- بو بايراق، قوزئي آزربايجان و تورکييه بايراقلاريندا اولدوغو کيمي آي-اولدوزلودور. آي اولدوز گٶي تورک سيککه لرينده ده وارايدي.

٣- بو بايراقدا آي هيلالي آزربايجان و تورکييه بايراقلارينداکينين عئينيسيدير.

۴- بئش بوجاقلي اولدوز: اولدوزون بئش بوجاقلي اولماسي بير ياندان گونئي آزربايجان و آزربايجان جومهورييتينين اٶزلرينه خاص کيمليکلري اولدوغونو وورقولاديغي حالدا، بو ايکيسينين بايراقلاري آراسينداکي آيريليغي ان آزا انديرير، بير ياندان گونئي آزربايجانلا تورکييه نين چوخ يٶنلو باغلاريني وورقولايير. بير ياندان اونو ايسلام دونياسينا باغلايير، عئيني حالدا آزربايجانين سئکولار بير توپلوم اولاراق شيعه-سونني چکيشمه سينه گيرمه يه جه ييني بيلديرير:

الف: گونئي آزربايجانين، قوزئيدن باغيمسيز اولان کيمليييني تمثيل ائدير: بئش بوجاقلي اولدوز گونئي آزربايجان و آزربايجان جومهورييتينين هر بيرينين اٶزونه خاص کيمليکلري اولدوغو گئرچه ييني وورقولايير.

ب: ان اسکي تورک دٶولت سمبوللاريندان بيريدير: بئش بوجاقلي اولدوز ان اسکي زامانلاردان بري تورک سمبوللاريندان بيري اولوبدور. اٶرنه يين گٶک تورک يارماقلاري (سيککه لري) اوزه رينده ده بئش بوجاقلي اولدوزلار بتيمله نيبلر (تصوير ائديليبلر).

ج: گونئي آزربايجانين دئوريمچيليييني تمثيل ائدير: گونئي آزربايجان اينقيلابلار اٶلکه سي؛ اسارتي، کٶله لييي قبول ائتمه يه ن، اونلارا باش قووزايانلارين يوردودور. گئچميش تاريخيميزده باي بک حرکتي و ياخين تاريخيميزده ستتارخان، خيياباني، و ميللي حٶکومتين پارلاق اولدوزو آزربايجان، تورک، ايسلام و دوغو دونياسيندا پارلايير. چاغداش دونيادا دا اينقيلاب و عوصيان سمبولو اولاراق تانينميش اولان بئش بوجاقلي اولدوزون گونئي آزربايجان بايراغي اوزره رينده قويولماسي، هم گونئيين اينقيلابچيليغي و چاغداشليغيني بو بايراغا دا داشييير.

د: تورکييه و عراق-سورييه ديياسپوراميزلا اولان چوخ يٶنلو باغلاري وورقولايير: بايراقداکي بئش بوجاقلي اولدوز، گونئي آزربايجانين بير چوخ آچيدان، ائتنيک، بوي-اويماقلار، لهجه، اينانج (قيزيلباشليق)، و ….. تورکييه ايله اولان اينساني، تاريخي، ديل-لهجه و سيياسي باغلاريني وورقولايير. بئش بوجاقلي اولدوز آيريجا گونئي آزربايجان بايراغيني بئش بوجاقلي اولدوزو اولان عراق و سورييه ده ياشايان تورکمان ائلي ديياسپوراميزين بايراقلارينا دا ياخينلاشديرير.

ر- فارس شيعه چيلييينه قارشي بير ايچه رييي واردير: آي و بئش بوجاقلي اولدوز، بوگون دونيادا اٶزه لليکله خيريستييان دونياسيندا ايسلامين و آسلان-گونه ش-قيليج آرمي شيعه لييين سمبولو اولاراق آلقيلانير. شيعه –سونني داعواسي اٶزه لليکله سون ٥٠٠ ايلده هم خالقميزي، هم باشقا تورک خالقلاريني، هم موسلمان دونياسيني بٶلوب پارچالاميشدير. پهلوي رئژيمي بو نييتله بوتون موسلمان دٶولتلرين ترسينه قيزيل آي يئرينه آسلان-گونه ش- قيليجي اٶز سمبولو اولاراق سئچميشدي. اٶته ياندان ايرانين هم پهلوي و هم ايسلامي دٶولتلري تورک خالقي و آزربايجاندا شيعه فاناتيزميني آلوولانيرماقلا، خالقيميزي گئنه ده اسکيده اولدوغو کيمي اويوتماغا، اونو هم تورک دونياسيندان و هم مدني-لاييک دونيادان آييرماق ايسته يير. ايندي بيز، چوخونلوغو شيعه اولان و گئچميشده شيعه-سونني ايختيلافيني کٶروکله يه ن بير خالق کيمي اٶز، بايراغيميزدا ايسلام دونياسينين دا سمبولو قبول ائديله ن بئش بوجاقلي اولدوز و آيي سئچمه کله، دونيايا گونئي آزربايجانين گئچميش آجي يانليشليلاريندان درس آلديغيني، و بير يول داها شيعه-سونني چاتيشما و آيريشماسينا گيرمه يه جه ييني بيلديرير.

، بیر میللتین سسی
پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش کاپانیبدی