یاشاسین آذربایجان - Long live Azerbaijan

.

د.ا.ک٫ دؤولت بودجه سي ايله ايداره اولونان آذربايجان دياسپورا هرکاتي نين ايچينده اريمه مه سي اوچون، گئچ اولمادان اؤز موستقيل يولونو توتمالي، بو يؤنده اؤز باغيمسيز ستراتئژيسيني اورتايا قويماليدير. من اينانيرام کي، ۵۰-ميليونلوق بؤيوک آذربايجان خالقيندان دانيشان بوگونکو آذربايجان پرئزيدئنتي، د.ا.ک-اين باغيمسيز اولماسيني و حاکيميت ديپلوماسيياسينا اويمايان بوتؤو آذربايجانلا - اؤزلليکله گونئيله باغلي ايلگيلنمه سيني ايسته يير و بو يولدا گرکن دؤولت بورجونو دا ادا ائده جگي نين يوللاريني آراشديرير. بو دا او دئمکدير کي، د.ا.ک بؤيوک و بوتؤو آذربايجانين دونيا ائلچيسي اولمالي و اونون آچيق قولو کيمي يؤنلنمه ليدير.

---

---

بو يازي داک-اين ۰۷-۰۸/۰۷/۲۰۰۷ کؤلن (آلمان) قورولتاييندا سسلنميشدير!

د.ا.ک-اين ۱۰-اونجو ايل دؤنومونده هامينيزي سالاملايير، بو ديرلي موناسيبته گؤره سيزي و بوردا اولمايان بوتون داک سئورلري تبريک ائديرم.

۱۹۹۷-اينجي ايلده آمريکانين کاليفورنييا ايالتينده يارانان د.ا.ک، بوگونه ده ک چوخلو يئنيش-يوخوشلاري باشيندان کئچيرميشدير. ايستر ايدئولوژيک، ايستر سياسي، ايسترسه ده دياسپورا هرکاتيندا د.ا.ک-اين دانيلماز چالالاري اولموشدور. د.ا.ک ۱۹۹۷-اينجي ايلدن بوگونه ده ک ۹ قورولتاي کئچيرميشدير. باخماياراق کي، کئچيريلن هر قورولتاي د.ا.ک اوچون بير اوغور ساييلا بيلر و د.ا.ک-اين آذربايجان تورکلري نين ايچينده گرچکدن وار اولماسيني ايثبات ائدير. لاکين بونونلا ياناشي د.ا.ک-اين اوزرينه دوشن آغيرليقلارين يئرده قالماسينا دا گؤز يومماق اولماز! د.ا.ک عؤمرو بويو ” نئجه تشکيلات اولماليييق ” سورغوسو ايله اوز-اوزه قالميشدير. بللي اولان بو گون ده، يارين دا، گلن ايللرده ده د.ا.ک بو سوالين قارشيسيندا جاوابسيز قالاجاقدير.

چونکي، د.ا.ک-اين ايکينجي درجه لي بير قورولوش اولماسي بو سوالين جاوابينا ايمکان ياراتماياجاقدير. د.ا.ک بير ايجتيماعي قورولوشدور. بو، او دئمکدير کي، د.ا.ک-دا فعال اولان هر کس، سايي بللي اولمادان بير و يا اونلارجا ايجتيماي قورولوشدا و سياسي پارتيدا اولا بيلر. باشقا سؤزله، د.ا.ک تامام ائنئرژيلي حقيقي اينسانلارين ديناميک هوقوقلو مرکز قورولوشو دئييلدير. د.ا.ک آچيقجاسينا سياسي اينسانلاريميزين ان خوش باخيشدا ايکينجي درجه لي مکاني اولا بيلر. سؤزسوز کي، بونا گؤره، کيمسه ني سوچلو حساب ائتمک اولماز. د.ا.ک ايسه بير ايجتيماعي تشکيلات اولاراق اؤز عوضولريندن د.ا.ک اوچون فدايي اولماغي ايستييه بيلمز.

بو اوزدن، د.ا.ک سياسي حدفلر داليسيجا اولان عوضولري نين بيرنجي تشکيلاتي دئييل و د.ا.ک-چيليقدا بو دوستلاريميزين بيرنجي آماجي اولا بيلمز! ساده سؤزله، هدفي سياسي اولان هر اينسانين بيرينجي آماجي سياسي ماراقلاريدير. بير ساده اؤرنکله مسئله ني داها دا آيدينلاشديرماق ايسترديم. همين قورولتايدا سياسي قورولوشلاردا عوضو اولان بير چوخ د.ا.ک عوضوو واردير. بو دوستلاريميز، اؤلکه ميز آذربايجان جومهوريتي نين سياسي آلانيندا حاکيميت و موخاليفت يؤنلو حدفلري رهبرليک ائديرلر. بو دوستلاريميزين بير قوروپو حاکيميت اورقانلاريني الده ساخلاماق، بير قوروپو ايسه همين حاکيميتي ايشدن ساليب اؤزلري حاکيم اولماق ايسته ييرلر. بو هر ايکي سياسي گوجون چئوره سينده ۱۰۰٫۰۰۰-لرله سيمپات کوتله دايانماقدادير.

د.ا.ک بير ايجتيماعي تشکيلات اولاراق بو ماراق دايره سي نين ديشيندا دايانماق زورونلوغوندادير. سيزجه سياسي ماراق دايره سيندن اوزاقدا دايانماق زورونلوغوندا اولان داک، هانسي گئنيش و قاپساملي ميللي و يا خود عومومميللي وظيفه ني بيرينجي درجه لي پروبلئم کيمي اورتايا قويا بيلر؟ سياسي ايراده سي اولمايان ميليي-ايجتيماعي بير تشکيلات نه آد داشيييرسا داشيسين، نئچه ياشلي اولورسا اولسون، اينسانلاري گونده ليک مقصدلره داشيماق کاپاسيته سينده اولماديغي اوچون حايات بويو بيرينجي درجه لي بير قورولوشا چئوريله بيلميه جکدير. د.ا.ک-اين بوگونکو ان بؤيوک پروبلئمي بوندان عيبارتدير. ائله بونا گؤره ده، د.ا.ک بوگونه ده ک اؤزونو بير آنلاملي اولاراق تانيملايا بيلمه ميشدير.

باشقا سؤزله، د.ا.ک هر ايل نيظامنامه و اساسنامه دييشديرمکله تمل پروبلئميني اؤرت-باسدير ائتمه يه چاليشير. حال بو کي، پروبلئمين تمه ليني نيظامنامه لرده دئييل، د.ا.ک-اين باخيش بوجاغيندا آختارماق گره کير. اصلینده هر قورولتايدا اوز وئرن نيظامنامه دييشيکليگي د.ا.ک-اين پروبلئملريني داها دا هلل ائديلمز نوقطه يه داشييير. اؤرنگيم کئچميشدن بو گونه ده ک د.ا.ک آدينا ده ييشن نيظامنامه لرين وئرديگي ضيانلاردير.

نه ائده جگي، نئجه ائده جگي، هاردا و کيملرله ائده جگي بللي اولمايان د.ا.ک-اين ان بؤيوک پروبلئميني اونون بليرسيز دونيا گؤروشودور.

“د.ا.ک نه کيمي کيمليک داشييير ؟” سورغوسو بو گونه دهک هر کس طرفيندن آيري-آيري و حتي بير-بيرينه اويمايان فورمالاردا تعريف اولونموشدور. بعضيلرينه گؤره، د.ا.ک٫ اورگي، بئييني اولمايان کيمليکسيز و ستراتئژيسيز ياشايان بير پروبلئمدير! بو تعريفي وئرنلره گؤره، د.ا.ک-اين تکجه گوونجه سي آذربايجان حاکيميتيدير. سؤزسوز کي، د.ا.ک-اي باشقا جور تعريف ائدنلرده واردير.

آمريکادان استراليايا چکيلن، سوئد، آمريکا و اوکرايندا رئسمي قئيده آلينان د.ا.ک٫ بوتون منفي موناسيبتلره رغمن ديشاريدا اولان باشقا آذربايجان قورولوشلاريندان قات-قات گئنيش و گوجلودور. آنجاق بير گرچگي اونوتماماقدا فايدا واردير. بئله کي، د.ا.ک رسمي مرکزي، پروفئسسييونال کادري اولمايان، استراتئژي و تاکتيکلردن يوخسون بير قورولوشدور. ائله بو اوزدن بوتون چاليشمالاري دويغوسال قدرلره باغليدير. نه يازيق کي، د.ا.ک-اي بئله گؤرمک ايسته ينلر ده آز دئييلدير. ۵۰ ميليوندان آرتيق ۸۰٪ عليل بير توپلومون آجي طالعي بئلنجي قورولوشلارلا اؤز هلليني تاپا بيله جکمي!؟ د.ا.ک اؤز اوزرينه گؤتوردويو آغير يوکو داشييا بيله جکمي؟

د.ا.ک اوزرينه دوشن ميللي بورجونو اؤدمک اوچون بيرنجي اولماق زوروندادير. باشقا سؤزله، د.ا.ک ايکي يول آيريجيندادير. يا بيرينجي اولماليدير و يا بير ايجتيماعي درنه يه چئوريلمه ليدير.

د.ا.ک بيرينجي اولا بيلرمي؟ بعضيلرينه گؤره، د.ا.ک-اين بيرينجي اولما شانسي تعبير اولونماز دادلي بير يوخو هيکايه سيدير. بو دورومدا د.ا.ک-اي بئله چاره سيز گؤرنلر چوخ دا هاقسيز ساييلا بيلمزلر. اؤرنگيم د.ا.ک-اين ۳-ايل بوندان اؤنجه ياراتديغي فوندودور. سايين جواد بئي باشچيليغيندا يارانان همين فوند بو گونه ده ک بوم-بوشدور. د.ا.ک-اين ايجتيماعي راييني بورادا گؤرمک اولار. اينانيرام بو اؤرنک هر کسي قانع ائده جک قدر آيديندير.

گؤروندويو کيمي بئله گئديشله د.ا.ک-اين ايداره چيليگيندن، تئکنيک باخيشيندان و آرزولاريندان آسيلي اولماياراق، بيرينجي اولماسي مومکون دئييلدير. آنجاق، بئله دئييب د.ا.ک-دان واز کئچمک ده دوغرو اولماز. منجه د.ا.ک-اي بوگونکو دوروموندان داها يوکسکلره داشيماق يوللاري قاپانماميشدير. بو دييشيم اوچون، د.ا.ک-اين يئني ايداره چيليک تيپه احتيياجي واردير. بورادا سؤز قونوسو فردلر دئييل، بلکه سيستئمدير. يازيقلار اولسون کي، د.ا.ک بو گونه ده ک هر هانسي آلان اوچون ان اوفاق بئله پروژه اورتايا قوياماميشدير.داک بوتون ساهه لرده پروژه سيز قالاراق ۱۰ ايليني کئچيرمکده دير. د.ا.ک-اين ائکونومي ساهه سي يوخدور.

بو او دئمکدير کي، د.ا.ک پروفئسسييونال اولماق ايمکانلاردان چوخ اوزاقلاردادير. چونکي، گلير قايناغي اولمايان بير قورولوشون گليشميش، اوزمان و اؤزل کادري دا اولا بيلمز. د.ا.ک بو نيته ياخينلاشماق اوچون اؤنجه پسيکولوژيک و باخيش دييشيکلييه ال وورماليدير. د.ا.ک-اي يئردن قوپاريب، ۵۰- ميليوندان چوخ بير ميلتين مرکز گوچونه چئويرمک گئنيش دوشونجه، قورخماز و سينگرن ميللي ايرادئيله اولا بيلر. د.ا.ک بو گوجه يييلنمک اوچون ميلته اوز چئويرمه ليدير.

اوروپادا، روسيه ده - اوکرايندا، آمريکادا، يوردوموزدا و دونيانين دؤرد بوجاغيندا بو يولا خيتمت ائده جک کيفايت قدر يوردسئور اينسانيميز واردير. د.ا.ک-اين يئني يؤنتيمي بو يولو آچماق اوچون گئجيشمه دن ايشه باشلاماليدير. يقين کي، بو يولدا د.ا.ک-آ قارشي اولانلاردا اولاجاقدير. د.ا.ک بؤيوک دوشونرسه بو پروبلئمي ده چؤزه بيله جکدير. ائله بونا گؤره، هر شئيدن اؤنجه د.ا.ک ايچينده بوتؤولوک روحو حاکيم اولماليدير. اينسانيميز فيکيرده، عملده بوتؤو اولارسا، اونو گونئيلي، قوزئيلي، اروپالي، آمريکالي، روسيه لي، اوکراينلي اولماق دئييل، سادجه آذربايجان تورکو اولماق ايلگيلنديره جکدير.

د.ا.ک، قورخمادان، چکينمه دن اؤزونو تعريف ائتمگي باجارماليدير.

د.ا.ک، يا
(ا . دؤولتيميزه تابئ اولان بير دياسپور قورولوشو اولمالي، تابئچي بير اورقان کيمي يولونا داعوام وئرمه ليدير.

و يا
(ب . دؤولتيميزه اينانان، اونون چيخارلاريني، دونيادا مودافيئ ائدن، باغيمسيز و اؤزل يؤنتملي ميللي-ايجتيماي قورولوش اولماليدير.

بورادا تابئچيليکله (باغليليق)، قايلچيليگي (ينانجليق) آراسيندا فرقي دوزگون باشا دوشمک گره کي ر. آذربايجان دؤولتچيليگينه قايل اولمايان، اينانمايان هر هانسي آذربايجان آدي داشييان قورولوش، کسينليکله آذربايجان قورولوشو دئييلدير. او قورولوش ان خوش باخيشدا غئيري ميللي، ان سرت باخيشدا ايسه، دوشمنلر عليله قوراشديريلميش بير اؤرگوتدور. اينانج و قايلليک بير روحچولوق طرزيدير.

بو اوزدن د.ا.ک هئچ زامان آذربايجان دؤولتچيليگينه قارشي قايلچيليک روحونو الدن وئرممه ليدير. لاکين تابئچيليک بير فيزيکسل ترجيهدير. د.ا.ک٫ دؤولتيميزه تابع اولارسا، يالنيز بير يول سئچيمينده قالار. او يول ايسه آنجاق دياسپورا تشکيلاتي اولماقدير! او زامان د.ا.ک-اين اوزرينه دوشن آغير وظيفه لر ده يونگوللشه رک، اونا تبليغاتچي کيمليگي وئره جکدير. بئله دورومدا، د.ا.ک٫ ان اوفاق ميللي-سياسي شوعاعر وئرمکدن بئله چکينه جکدير. دؤولتيميزين اوزرينه آغيرليق باسان هر هانسي اولوسلاراراسي سياسي شانتاژ و پروپاکانتا، د.ا.ک-اين دا اوزرينه آغيرليق ائده جکدير. ساده سؤزله دئسک، د.ا.ک آنجاق آذربايجان دؤولتچيليگينه تابئ اولان بير تبليغات واسيطه سي اولاجاقدير.

طبيعي کي، بو دا بير يولدور. د.ا.ک٫ اؤز دورومونو بللي ائتمه ليدير. يا موستقيل اولوب، اؤز تاوانينا گؤره تشکيلاتلانمالي، حرکت ائتمه ليدير، يا دؤولتيميزه تابئ اولاراق، آچيقجاسينا دؤولت پروژه لرينه قاتيلمالي، دؤولتين دياسپورا بودجه سيندن يارارلانماليدير.

اؤزونو جسارتله تعريف ائدبيلمه يه ن د.ا.ک٫ کسينليکله بو ايکي يولون آراسيندا سفيل قالماغا محکوم اولاجاقدير. بو آچيق سؤزلر بلکه ده بعضيلري اوچون باش آغريسي اولسون. آما بو گون ميليونلار آذربايجان تورکونون د.ا.ک قارشيسيندا اورتايا قويدوغو سورغو بوندان عيبارتدير. ان آزيندان ۳۵ ميليونلوق گونئيين ميللي هرکاتي ايله ايلگيلنن آيدين کسيم بو قونودا ايصرارليدير.

هر کسين بيلديگي کيمي، آذربايجان دؤولتيني ايداره ائدن بوگونکو ايقتيدار سون ايللرده دياسپورايلا ايلگيلي گئنيش حرکتلره ال وورموشدور. بو حرکتلر آذربايجان دؤولتي نين بير باشا سيياستينه داخيل اولدوغونا گؤره، بؤيوک سونوجلارا وارميشدير. کيم نه دئييرسه-دئسين خؤيايدک سون ايللرده اورتايا قويدوغو تورکچولوک جسارتي، تکجه آذربايجان دياسپوراسي دئييل، داها دا گئنيش تورک دياسپوراسيني حرکته سالميشدير.

ان آزيندان بو او دئمکدير کي، آذربايجان دؤولتي نين گئنيش اؤلچولو بير دياسپورا مرکزي واردير. و بو دياسپورا مرکزي دؤولت سيياستلريني اورتايا قوياجاق گوجه ماليکدير. بئله اولان حالدا د.ا.ک-اين دياسپورا مرکزينده دايانا بيله جک و اونا يؤن وئره جک آرزوسو بوش و آنلامسيز دئييلمي؟ آچيقجاسينا دئسن، د.ا.ک٫ دؤولت بودجه سي ايله ايداره اولونان آذربايجان دياسپورا هرکاتي نين ايچينده اريمه مه سي اوچون، گئچ اولمادان اؤز موستقيل يولونو توتمالي، بو يؤنده اؤز باغيمسيز ستراتئژيسيني اورتايا قويماليدير.

من اينانيرام کي، ۵۰-ميليونلوق بؤيوک آذربايجان خالقيندان دانيشان بوگونکو آذربايجان پرئزيدئنتي، د.ا.ک-اين باغيمسيز اولماسيني و حاکيميت ديپلوماسيياسينا اويمايان بوتؤو آذربايجانلا - اؤزلليکله گونئيله باغلي ايلگيلنمه سيني ايسته يير و بو يولدا گرکن دؤولت بورجونو دا ادا ائده جگي نين يوللاريني آراشديرير. بو دا او دئمکدير کي، د.ا.ک بؤيوک و بوتؤو آذربايجانين دونيا ائلچيسي اولمالي و اونون آچيق قولو کيمي يؤنلنمه ليدير.

د.ا.ک-اين ۹-اونجو قورولتايي
کؤلن-آلمان
۰۷/۰۷/۲۰۰۷

، بیر میللتین سسی
پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش کاپانیبدی