بوتؤو آذربايجان سؤيله ميندن اوزاقلاشماق، فارس شووونيسمينه يارديم ائتمک دئمکدير

بای بک، آذربایجان | دوزگؤن, ۴-ي قوراپيشيرن , ۱۱۰۰۷ اینجی ایل, چولا ۰۵:۰۷ | بای بک, تورکجه, مقاله

سايين گؤنتاي جاوانشير ياخينلاردا بير مقاله ده* گونئيده و قوزئيده وئريلن شوعارلارین ان اؤنمليسينه توخونوبلار. بو مقاله ده، گونتاي بئي بيزيم اينديکي دورومو نظرده آلاراق و دونيانين سياسي دوزه نينه باخاراق، بو شوعارلارين وئريلمه سيني گونئيه باشدا، و قوزئيه آرديندان بير تهلوکه اولاراق تانيتيب.

جاوانشير بئيين وئرديگي اؤرنکلر ايسه، ايلک باخيشدا اونون اؤنه سوردويو ايديعايا دستک وئرير، آنجاق بيلديرمک ايسترم کي بو آرادا بؤيوک بير سهو اورتاليغا چيخيب. اصلینده سهو

جاوانشير بئيين وئرديگي اؤرنکلر ايسه، ايلک باخيشدا اونون اؤنه سوردويو ايديعايا دستک وئرير، آنجاق بيلديرمک ايسترم کي بو آرادا بؤيوک بير سهو اورتاليغا چيخيب. اصلینده سهو دئمک بلکي يانليش اولسون، دوزونو دئسم بير قارماشا يارانيب.

ايکي بير جينسدن اولمايان شئييي توتوشدورماق يانليشدير. گونتاي جاوانشير مقاله سينده بو سهوه يئر وئريبلر. لاتين آمريکا يا و اوردا باش وئرن حاديثه لرده، آ.ب.ش-اين اوردا يوروتدويو سياست و کومونيسمين ياييلماسينا (يايينلاردا) يارديم ائتمه سي هرکسين ماراغيني چکير. آما بو اؤرنک آذربايجان ايله نه ايلگيده اولا بيلير کي؟

آذربايجان دئديگينده، بؤيوک بير جوغرافيا آلانيندان سؤز گئدير. بو بؤيوک آلانين باشينا گلن اويونلار ايسه، هله دئولتلرين تاريخيندن سيلينمه ييب و هله ده سندلري عوموما سونولماييب. ندن کي آذربايجاني پارچالاماق، ميلتيني آييرماق و سياسي اولاراق بير پاسيو شکيله دؤنوشدورمک ياخين ايللرده باش وئريب.

بيزيم هر بير داورانيشيميز و رئاکسياميز طبیعي کي غرب اولکه لري خصوصي ايله آ.ب.ش طرفيندن اينجله نير. بوردا من اينانيرام کي الده ائديله جک سونوج، آذربايجانا قارشي يوخ بلکي تام ترسينه، آذربايجانا بير يارار اولاراق آدلانديريلماليدير.

ايلک اينجله مه ده، هر بير سياسي شخص، بير اولکه نين تاريخيني آراشديرير. بو آراشديرما يؤنتميندن الده اولونان سونوجلار، بو گون و گله جک داورانيشلارين اينجله مه سينده و اونلارا داياناراق پلان ياپماقدا اؤنملي رول اوينايير. سيزجه غرب سياسي-تاريخي آراشديرماجيسي آذربايجان تاريخينه باخاندا نه گوره جک؟

آذربايجان بير دير، بير پارچادير و بير ميلتيندير. آما باش وئرن اينانيلماز اولايلار، يئرسيز گوزشتلر، خيانتلر و قورخولار سونوجو، داغيليب، آيريليب و ساتيليب. هر بير گونئيليدن سورشسان، آرازين او تاييندا ايتيرديکلريندن دانيشير. قوزئيليدن سوروشاندا، آرازين او تاييندا ياشاميش اولان اجداديندان دانيشير. آرازين او تايي هارا دير؟

ايللردير بيرلشمه يه جان وئرن بير ميلتين ايسته یينه کيم قارشي دورار و ندن؟

ايشته بيزيم چاليشيب سونوج آلاجاغيميز بؤلوم بوراسيدير. آذربايجان دونيانين هيچ بير يئرينده اولمايان بير اولکه دير، بونا گؤره آيري يئرلرده اويقولانان يؤنتملرين اويقولانماسينا موناسيب بير يئر ديير. هر بير سورونو اؤنجه بؤلوب پارچالاييب و اينجليه جه یيک. سورويا يانيت تاپمادان اؤنجه، سورويو آنلامالييق.

سورو بودور: آذربايجانليلار ندن بيرلشمک ايسته ييرلر؟

اگر بو سورويا ديقت ايله ياناشساق، بو بؤلمه لره واراجاييق:
۱- آذربايجان هارادير؟
۲- آذربايجان کيملريندير؟
۳- آذربايجان ندن پارچالانيب؟
۴- پارچالانميش آذربايجاندا کيملر ياشايير؟
۵- پارچالانميش آذربايجاندان گلن يارارلار نه ديرلر؟
۶- آذربايجان بيرلشيرسه اوردا ياشايانلارين دورومو نه اولاجاق پارچالانميش؟
۷- بؤتوو آذربايجاندان گله بيله جک يارارلار نه اولاجاق؟
۸- …

ايندي ايسه، بو بؤلمه لره دوشونه رک، بلکي بير سورونون (هله ليک) آنلاماسينا چاليشميش اولوب، داها سونرا سورونون يانيتينا قاييديب و گونوموزون دورومو ايله اويقون اولان بير يانيت هازيرلاياجاييق.

سورونو بؤلمه لرده آچديقدان سونرا، دييشيک اولکه لرين ماراخلاري گؤزوندن اونا ياناشماليييک. بيرينجيسي ايران آدلانان اولکه دير، داها سونرا قومشولاريميز تورکيه (بير سويدان، دئولت صاحيبي)، گورجيستان، کوردلر (ار يا گئج اولکه قوراجاقلار، چاليشاق کي بيزيم تورپاقلاردا قورماسينلار)، ارمنستان و روسيه دير. بونلاردان سونرا، غرب اولکه لري و باشدا آ.ب.ش نين ماراخلارينادا باخماليييق.

هله بورايا قدر، يالنيز بير سورونون اينجله مه سينه چاليشميشيق. بو سورونون آرديندان گلن، ايلگيلي اولان و يئني يارانان سورونلار هله اوزاق ساخلانيبلار.

آذربايجان بؤتوولوکدن واز گئچيب و تاريخي تورپاقلاريني ايستمه ليدير.

ميللي بيچيمده بيز هاميميز بير ميلتدن اولماميزا اعتيراف ائديريک. ايستر ايسته مز بير چکينتي بيزلري بير بيريميزه ياخلاشديرير. بو بير شخصده شيددتلي اولوب حربی ساواشا يؤنه لير، بيرينده کنترول اولونموش اولوب سياسي ساواشا يؤنله نير و بيرينده ايسه گيزلي اولوب و زامانا باخير. آما آزدان چوخدان هامي بيرليگه اينانير و اؤرگي نين آرخالاريندا اونو آرزو ائدير. بونون آدي “ميللي ايستک”دير. ميللي ايستک قارشيسيندا دايانان مئهو اولور. ايستر قومشولار اولسون، ايسترسه اوزاق اولکه لر.

آما، اونوتمامالييق کي ميللي ايستکين او يان بو يانينا زنجير وورماق، شخصلر گيرديرمک و پلانلار ياپماق، ياشايان تهلوکه ديرلر. و ايشته بوردادير کي بؤتوو آذربايجان سؤيله مي شووونيسمه خيدمت ائتمه يه باشلار. يوخسا صاف و صاديق بير ميلتين حاق آرزولاري نين ضرري کيمسه يه يئتيشمز.

آلمان دا ياشايان آلمانلار هيچ بير زامان اؤزلريني بيربيريندن آيري بيلمه ديلر. سياسي ساواش، حربي ساواش و يادلارين پلانلاري اونلاري ايللر بويو آيري ساخلادي. برلين اورتاسيندا تيکيلن دووار آيدينجا بير ميلتين پارچالانماسي ايدي. آما باخاليم بو آيريليغا دايانان اولدو مو؟ نئچه لر آلمان سويداشي دووار اوستونده جان ورديلر؟

اونوتماياق کي آيريليغين ياراتديغي دييشيکليکلر بعضن دوزلمه يه ن گؤرونور، آما اينانيرام کي بو دييشيکليکلر ساختا اولدوقلاري اوچون، قولايجاسينا دوزه ليب و حتّی اينکيشافا دؤنوشه بيليرلر.

روسلار، فارسلار، ائرمنيلر و کوردلرين بوراخديقي اتکي گؤزده آغير اولسادا، تاريخيميزا داياناراق آنيدن چؤزوله بيله جک دوروما دوشه جکلر. آتا سؤزو دئییر کی: گؤز نامرد اولار، آیاق مرد.

اگر بؤتوو آذربايجان سؤيلميندن قورخوب، باشقا اولکه لرين ماراغينا گؤره ياشاييب و گؤزشته گئدن تورپاقلاردان واز گئچسک، دئمک ۱۰ ايل ايچينده آرتيق آذربايجان آديندا بير اولکه اولماياجاق. قاراباغ گئتمک دورومونا سالينيب، کوردلرين ياييمي هيزلانيب، فارسلارين آسدي کسدي سياستي شيدت تاپيب، باشقا اولکه لر ايسه بيزدن سس دويماديقلاري اوچون، بيزي سايماييرلار. ايندي سيز دئيين کي بس بيزيم سؤيلملره کيم قولاخ وئرير؟

من گونتاي بي ايله بير يؤنده فيکيرداشام، او دا بودور کي غرب اولکه لري نين ايسته کي اولماسا، بيز گونئيده موستقيل اولا بيلميه جه یيک. هله قالسين کي اوندان سونرا بؤتوولشمه يه دوشونک.

آنجاق غرب اولکه لري نين “هن” جوابيني آلماق اوچون، ايستکلريميزده اينديريم ياپمامالييق. بلکي ايستکلريميزي اونلارا تحميل ائتمه لييک. اونلارين ايستکلري، بيزيم وارليغيميزدير، سيزجه وارليغيميزي وئره جک قدر گئري قالميش بير ميلتميگيک؟

يئرکؤکو (هویج) ايله چوماق بيزدن اولسون!!

داها اؤنجه بير مقاله مده يازميشديم کي اگر بيز سؤز صاحيبي اولماق ايسته ييريکسه، اؤنجه الده ائديله جک معامله وسايلي ياراتاجاييق. بيزيم وارليغيميز معامله ده اولورسا، قازانماق اولماياجاق. آما اگر وارليغيميزين قورونماسي بيزه وظيفه اولوبدا، باشقا وسايل اؤزرينده معامله يه گيرمک ايسته ينلرله دانيشيغا باشلاساق، اوتوزساقدا، وارليغيميزا توخونان اولماياجاق.

قاراباغ يا سولدوز؟

بو ايکي بؤلگه، آذربايجانين قانايان يارالاري ساييليرلار. بيريسي ائرمني بيريسيده کورد سالديريسينا اؤغراييب. اگر بونلارا قطعي جواب وئريلمزسه، کسين باشقا بؤلگه لرده قانايان يارا اولاجاقلار!!!

من امينم کي ايندي فارس يارديم اولماساييدي، بير دانا کورد گونئي بؤلگه لرينده تاپيلمازدي (ايشقالچي کورد). ائرمنيلرين آرخاسيندا روسلار اولمازسالار، بيزيم تورپاقدا قالماغا جسارت ائده بيلمزلر. آما بو ايکي يارا هله قاناتير. ندن کي بيز فارسلار و روسلار قارشيسيندا گوجلو بير دوروم ياراتا بيلمه ميشيک. اگر معامله اوچون، روس يا فارسين قيديخلانان يئريندن (تبريز مثليدير، يعني: هسساس نوقتاسي) توتوب و اونو اورتايا سؤرسک، اينانين کي ساباح تورپاقلاريميز آزاد اولاجاق.

يوخسا اگر اونلارا قارشي دوروب حربي ساواشا گيرسک، آغير ايتگي وئرمه ميزه باخاراق، تورپاقلاريميزين قاييتماسينا اينانيرام. من امينم کي اگر بو گون قوزئي عسگري قاراباغي آنا وطنه قايتارماق اوچون ايشه باشلاسا، گونئيده ۳ قات داها عسگر ساواشجي گؤندريله جک، آما، ايلک اؤنجه اؤز آراميزدا بيرليک ياراتماليييک.

ياخين گونلرده آتا باي بک ين دوغوم گونو قوتلاناجاق، بو گونو قوزئيده يايماليييک. بو گونلر ميللي فعاللار دايانمادان او تاي بو تاي اولايلارين ياييب و خبردارليق وئريرلر، بو ايش چوخ اونمليدير. ميللي بيرليک شوراسي نين يارانماسي نه قدر سورونلو اولسادا، يارارلي بير آدديمدير (بو باره ده گلجکده يازاجاغام)، قوزئي پارلامانیندا قالديريلان گونئي مسئله لري، ژورناليستلرين يارديمي و غرب اولکه لرين بياناتلاري، هاميسي بيزيم ياراريميزاديرلار. بونا گوج وئرمک اوچون، بير اؤنري اورتايا قويمادان بيتيرمک ايستميرم.

بير ميللی گون سئچیب آرازين او تاي بو تاييندا توپلانيب، دانيشمادان، ساواشمادان و چاشمادان آرازا چيچک وئرک. آراز هيچ بير زامان بيزي آييراماز، اگر، بير ميللي قورولتاي ايله اونو ده يه رلنديرک. بو قورولتاي، گله جک ايللرده باي بک قورولتايي نين او تايا داشينماسيني ساغلاييب، ميلتيميزي داها ياخينلاشديراجاق. و بو آدديم، تورپاق بيرليگي نين آدديمي اولاجاقدير.

ايلک بيرليک دوشونجه ده، ايکينجي بيرليک تورپاقدا اولاجاق.

تبريزلي باي بک (مسعود انتظار)
۲۴/۰۶/۲۰۰۷
گلاسگو

* [1] www.11007.bayb…