یاشاسین آذربایجان - Long live Azerbaijan

.

بیزه گوره بو آذربایجانین سووئره نلییینه رسمی موداخیله ساییلیر. یاد بیر اولکه نین دوولت باشچیسی نین ، بئین الخالق بیر توپلانتی دا بو دئدیکلرینه لاقئید یاناشماق مسئولییت سیزلیکدیر. بیزه گوره آذربایجان حوکومتی و دوولت باشچیسی قورخمادان ـ چکینمه دن بیر سووئرئن دولت کیمی اوز گوروشلرینی اعلان ائتمه سی گره کیر. یوخاریدا قئید ائدیلدی یی کیمی بو عین زاماندا بین الخالق صحنه ده آذربایجانین مستقیللی یینه ، دوولت و میللتینه وورولموش ان بویوک توهین و اهانتدیر. بیز آذربایجان میللتی طرفیندن کسین لیکه بونو دییه بیله ریک ، بیزیم اراضیلریمیزده و حتا قونشولاریمیزین اراضیلرینده هر هانسی جاسوسلوق مرکزی نین، اتوم سیلاح ، و راکئتلری نین ، آتوم ائنئرزی مرکزلری نین اولماسینا راضی دئییلدیر. میللتیمیز بولگه

---

---

آلماندا گئچیریله ن صنایع باخیمدان گلمیش اولکه لرین ییغینجاغیندان سونرا دونیانین چئشیدلی خبر آگئنت لیکلری ، تئلویزیون ومطبوعاتیندا آذربایجانین آدی نین سه سلنمه سی دیقتی چکمکده دیر. بو دا قاتیل پوتین جنابلاری نین اوز چیخیشیندا آذربایجاندا آمریکا ایله بیرلیکده راکئتلرین یئرلشدیریلمه سینی ایره لی سورمه سیندن قایناقلانیر. بونو قئید ائتمک یئرینده اولارکی، بو توپلانتی دا آذربایجان ایشتیراک ائتمیردی. و پوتینه ده آذربایجانی تمثیل ائتمه ایجازه سی وئریلمه میشدی. چونکی آذربایجان مستقیل بیر اولکه دیر ، اوزونون حوکومتی و پرئزیئنتیده واردیر. بئله بیر سوال اورتایا چیخیرکی ، بئله بیر وصی قیوملوغو بو قاتیل جنابا کیم وئریلمشدیر؟!!

پوتین بو چیخیشی ایله بیر دفعه داها دئموکراسیدان ، اینسان حاقلاریندان، دوولتلرین سووئرئنلی یینده ن نه انلادیغینی دونیا ایجتماغیتی گوزلری قارشیسیندا سرگیله میشدیر. بو اونون گوناهی دئییلدیر. بو او قاتیلی دعوت ائده ن ، بو جینایتکاری تاباغا قویان ، جینایتلرینه گوز یومانلارین گوناهیدیر. بو اورادا توپلانان دئموکراتیک اولکه لرین اوزلری اوچونده توهین دیر، بو ایشی ایلک اولاق آلمانین کئچمیش باش ناظیری شیرودئر جنابلاری اونو آلمانا دعوت ائدیب ، آلمان کیمی دئموکرات بیر اولکه نین، دئموکراتیک شکیلده سئچیلمیش پارلئمئنتوسوندا چیخیش حاقی وئریب ، اونو بویوک دئموکرات آدلاندیرمیشدی. او سوزلری نین و دعوتی نین موزدونو باش ناظیرلیقدان گئتدیکده ن سونرا آلمیشدیر. ائله او دعوت کیمی ، بو دعوت ده اونلارین دئموکراسی حاقدا دئدیکلرینه اینانجین آزالماسینا سبب اولماقدادیر. غربیلی لر پوتین جنابلارینی یاخشی تانیرلار. اونون قاش ـ گوزونه عاشیق دئییلر. آوروپا و غرب اولکه لری اوچون بوگون موهوم مسئله اورسییتین قازی ـ نفتی ، باشقا یئر آلتی قایناقلاری و ۱۵۰ میلیونلوق اورسییتین بازاریدیر. تاسوفله بو اولکه لر بونو آچیق دئمکده ن آغرینیرلار. اونلار عملده اوز چیخارلاری خاظیرینه چه چه نیستانی فدا ائتدیلر. بو گونئی آذربایجانلیلار اوچون بیر درس اولمالیدیر. بو دونیادا اوزلرینی دئموکرات ، اینسان حاقلای نین مودافعه چیسی آدلاندیران اولکه لرده اوز منافعلرینی هر شئیدن اوستون گورورلر. پوتین نین بو توپلانی یه چاغیریلماسی نین ائله سببی ده بودور. یوخسا ایتالیا ، هیند ، برئزیل ، ایسپانیا و… باشقا اولکه لر اورسیت دن داها چوخ صنایع لشمیش اولکه لردیرلر. نییه اونلار بو توپلانتی دا یوخدورلار؟!

پوتین آذربایجان دوولت و میللتیندن سوروشمادان ، آذربایجانین رسمی بیر نوماینده سی بو توپلانتی دا اولمادان، بئله بیر پیشنهادی اورتایا آتماسی حیاسیزلیق و اوتانمازلیغین زیروه سیدیر. پوتین جنابلاری بونو بیلمه سی لازیمدیرکی ، آذربایجان اورسییت ین شخصی مالیکانه سی دئییلدیر. آذربایجان سوئرئن ـ مستقیل بیر دوولتدیر. اونا وصی قیوم لازیم دئییلدیر. پوتین جنابلاری هنوز ۷۰ ایللیک آذربایجانی اوز مستعمره سینده ساخلاییب ، بو 70 ایلده آذربایجانا ووردوغو مالی و معنوی خسارتی وئرمه سینی دوشونمه لیدیر. بو جنابی بئله بیر پیشنهادی ائتمه یه مجبور ائده ن بیر نئچه عامیل واردیر:

۱ـ مسکووا کئچمیش سووییئت ایمپئریاسی خولیاسیندا یاشاماقدا ، هنوز کئچمیشده سووییئتلرین مستعمره سینده اولان اولکه لری اوز تاثیر داییره سی حئساب ائتمکده دیر. بونا گوره ده چئک جیمهورییتینده و لهستاندا آمریکا راکئتلری نین یئرلشدیریلمه سی ایله موخالفت ائتمکده دیر.

۲ـ بو قافقاز اولکه لری اوچونده کئچه رلیدیر. آمئریکا و غرب اولکه لری خزه ر بولگه سینی اوز ایستیراتئژیک منافع ساحه لری اعلان ائتمیشلر.بو نا گوره ه بولگه نین نفتینی آوروپایا اولاشدیرماق اوچون باکی ـ جئیحان نفت قورشاغینی پیلانلاشدیریب ، حیاتا کئچیردیلر. آوروپالیلار بو دوشونجه اساسیندا آذربایجان و گورجوستانی آوروپا شوراسینا آلدیلار. اوزون وعده لی اولاراق بو اولکه لرین ناتو عسگری بیرلی یینه «پاکتینا» آلینمالاری گوزله نیلیر. بونلار اوروسلاری پوتین باشدا اولماقلا قیجیقلاندیریر. تیکرار اوز آیاغینی بو بولگه یه سوخماق جهدینده دیر. آناـ بابالاریمیز دئمیشکن قاپیدان قوولان باجادان سوخولماق ایسته ییر. البته بو ایشده اوزوموزدن اولان اسمیلاسییونا اوغرامیش ساتقینلارین اولدوغونودا اونودماماق لازیمدیر.

بیزه آذربایجانلیلارا گوره، بو قاتیل جناب ایلک اولاراق آذربایجانین مستقیللی یینی ، سووئرئنلی یینی ، اراضی بوتونلویونو سوزده یوخ ، عملده رسمی تانیمالیدیر. ایران تئروریست ریژیمی ایله ـ ائرمنیلرله میللتیمیزه قارشی امکداشلیغا سون قویمالیدیر. ۱۹۱۸ ده ن سونرا روسلارین الی ایله آذربایجاندان قوپاریلمیش بوتون اراضیلر تیکرار آذربایجانا قایتاریلیب ، اراضی بوتونلویو تامین ائدیلمه لی، ۷۰ ایل سوویئت دوورونده آذربایجانا وورولموش مادی و معنوی خسارت اودنمه لیدیر. بوتون بونلار ایجرا ائدیلدیکده ن سونرا، ایکی مستقیل دوولت اولاراق، برابر حقوقلو اوتوروب، دانیشماق اولار. آذربایچانیمیزین اوزون وعده لی منافعینی دوشونه ره ک، بعضی امکداشلیقلارا گئدیله بیله ر. قوزئی آذربایجاندا حاکیمییتده هر هانسی بیریسی نین اولماسیندان آسیلی اولمییاراق ، آذربایجاندا هرهانسی بیر یاد اولکه نین راکئتلری نین یئرلشدیریلمه سی ، یاخود جاسوسلوق جاهازلاری نین قوراشدیریلیب ـ ایشه سالینماسی آنجاق و آنجاق ۴۵ میلیونلوق آذربایجان میللتی نین قراری ایله اولا بیله ر.قه به له جاسوسلوق مرکزی نین عمرونه ده همن سون قویولمالیدیر. روسلار بونو اوز اراضیلرنده قویا بیلیرلر.

غربیلی لر دئمیشکن آذربایجان موز جیمهورییتی دئییلدیر. گونئی آذربایجاندا دودورقایی، یاخود حسن سوخدو ده ییرمانی ـ ماتی مئیخاناسی دئییلدیر. میللتیمیزه گوره قاتیل پوتین نین بو توپلانتی دا آذربایجانی بئله راکئتلر اوچون موناسیب یئر گوسترمه سی، یونی آیی نین ۱۰ دا اوتانمادان اورسییت ین خاریجی ایشلر ناظیری نین بو پیشنهادی سی .ائن .ائن تئلویزییاسیندا تیکرارلاماسی عملده آذربایجانین مستقیللی یینی تانیماماقدیر. آذربایجان دوولتینه سووئرئنلی یینه بین الخالق صحنه ده حورمتسیزلیک و اهانت ساییلیر.

چوخ ـ چوخ تاسوفلر اولسون بوگونه قده ر آذربایجان حوکومتی و دوولت باشچیسی بو اهانتلره و دئدی ـ کودولارا (شايعه) رئاکسییا گوسترمه میشدیر. بیر صورتده کی، یولی آیی نین یئدی سینده پوتی نین بو پیشنهادینا همن رئاکسیا گوستریلمه لی ایدی. روسلارین آذربایجانداکی ائلچیسی «سفیرینی» آذربایجانین خاریجی ایشلر ناظیرلی یینه چاغیریلیب ، اعتیراض مکتوبو وئرمه لی ایدی. همده بئین الخالق سوییه ده آذربایجانین مستقیل بیر دوولت اولدوغونا اعتناسیز یاناشیلدیغیندان بو حاقدا بیرلشمیش میللتلر تشکیلاتینادا موراجیعت ائدیلمه سی الوئریشلی اولاردی.چوخ ـچوخ تاسوفله بوگونه قده ر آذربایجان طرفیندن بو حاقدا رسمی بیر آچیقلامادا یایینلانمامیدیر.

بیزه گوره بو آذربایجانین سووئره نلییینه رسمی موداخیله ساییلیر. یاد بیر اولکه نین دوولت باشچیسی نین ، بئین الخالق بیر توپلانتی دا بو دئدیکلرینه لاقئید یاناشماق مسئولییت سیزلیکدیر. بیزه گوره آذربایجان حوکومتی و دوولت باشچیسی قورخمادان ـ چکینمه دن بیر سووئرئن دولت کیمی اوز گوروشلرینی اعلان ائتمه سی گره کیر. یوخاریدا قئید ائدیلدی یی کیمی بو عین زاماندا بین الخالق صحنه ده آذربایجانین مستقیللی یینه ، دوولت و میللتینه وورولموش ان بویوک توهین و اهانتدیر.

بیز آذربایجان میللتی طرفیندن کسین لیکه بونو دییه بیله ریک ، بیزیم اراضیلریمیزده و حتا قونشولاریمیزین اراضیلرینده هر هانسی جاسوسلوق مرکزی نین، اتوم سیلاح ، و راکئتلری نین ، آتوم ائنئرزی مرکزلری نین اولماسینا راضی دئییلدیر. میللتیمیز بولگه میزین قئید اولونانلاردان تمیز ، باریش بولگه سی اولماسیندان یانادیر. آذربایجان دوولتی بئله بیر دورومدا قارشیدان گله ن تهلوکه نی درک ائده ره ک، ناتودا عضوو اولماق اوچون رسمی شکیلده موراجیعت ائتمه لیدیر.

آنادیلی قزئتی سايي ۲۷۴/۲۷۳

، بیر میللتین سسی
پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش کاپانیبدی