ياشاسين آذربايجان - Long live Azerbaijan

.

گؤنتاي بئي٫ لوتفن بايراق اؤچون گؤنئيده آلتئرناتيو اولاراق اؤز دوشونجه زي دئيين و بير ده سيزدن ايسته ييرم کي اؤز گؤروشوزي گله جک ايللرده (احتمال ۱۳۹۰) تورک ديلي ايکينجي ديل اولاراق آذربايجاندا رسمي اولما قونوسوندا بيلديرين. منيم بيلگيلريمه گؤره ۱۳۹۰ ايلينده فارس رژيمي تورک ديلين رسميته تانياجاق. بو سؤره بلکي آزاتيلا بيلير٫ ندن کي آذربايجاندا ميللي کيمليک ايسته گي داها بؤيويور. آذربايجان بايراقي بير کره يؤکسه ليب٫ اونو ده ييشديرن و يئنديرنين ال آياقي سينماليدير.

گؤنتاي بئي جاوانشير چوخ اؤنملي قونولاردان اولان بايراق مسئله سينه توخوناراق* ٫ آنلاملي شکيلده گرچکلري اينجه له مه يه باشلاييب. بو مقاله ديزي اولاراق يازيلماقدادير و هله ليک بيراينجي بؤلومو يايينلانيب. آما گلن بؤلوملرين يايينلانماسيندان اؤنجه٫ بايراق قونوسونا باشقا بير يؤندن باخيلماسيني وورقولاماق ايسته ييرم.

بايراق دولتچيليک به ره سيدير٫ دولتچيليک ايسه ميللتچيليک تثبيتيندن سونرا باشلانير. ميللتچيليگي اثبات ائتمک اؤچون بيلينچ٫ ساواش و قازانج دؤنملري ياشانيلماليدير. گؤنئي حرکاتي بلکي دؤنيادا گؤرونمز اولان بير اؤرنک اولا بيلير. ندن کي ميللتچيليک دؤنمي ايکي چاليشمانين بير يئرده يوروتولمه سيدير. يعني گؤنئي حرکاتيندا هم بيلينچ و هم ساواش بير آرادا و بير بيرينه قول اولاراق ايلرله مکده لر. بودا چوخ حساس و تهلوکه لي بير اورتام ياراتيب.

تهلوکه لي او اؤزدن کي اگر دوشمنلر بو دؤنمده بيزيم ساواشيميزا يانليش بيلينچ گيرديرسه لر٫ حرکاتيميز چؤکمه يه دوغرو گئده جک. و حساس بو باخيمدان کي اگر گؤنئيلي سياسيلر احساسات ايله حرکاتيميزا يؤن وئرمه يه و ساواشماقا چاليشسالار٫ قيرقين و بيلينچ يارارسيز اولاجاقدير.

بايراق ياراتماق نه دئمک دير؟

کيمسه دئمه مه ليدير قؤزئي ده اولان بايراق گؤئني ده دالقالانماليدير. آما کيمسه ده دئمه مه ليدير کي قؤزئي ده دالقالانان بايراق بيزيم ده يير. آذربايجان بيزيمدير٫ دولت بيزيمدير و بايراق بيزيمدير.

ميللت اؤزگورلوقونو آلديقدان سونرا٫ امک وئرن٫ ساواشان و ساواشي قازانماق يولوندا چابا گؤسترن سياسيلري دولت اولاراق سئچيرلر. بو دولت ميللي گؤجه داياناراق بير سيرا اولوسلار آراسي قوراللارا سايقي ايله داياناراق٫ يئني اؤزگورلوقه قاووشان ميللتي دؤنيايا تانيتماقا باشلار. تانيتيم ايسه آد (ميللي)٫ بايراق (سمبليک)٫ پارلمان (سياسي)٫ پول (اقتصاد) و اردو (نظامي) ياراتماق کيمين اساسي ايشلردن اولوشور.

آد قونوسوندا٫ گئچن يازيلاريمدا ** آيدينلاتديقيم کيمين بيزيم بير سيرا سورونوموز وار. قؤزئي بؤلومو شوروي دن آيريلاندا بير آد سئچيب و اؤزونه “آذربايجان” دئدي. بو ايش او زمان دوغرو گؤروشدويسه بيله ياپيلمامالي ايدي. آذربايجانين بؤيوک بؤلومو ايشقال آلتيندا اولاراق نئجه بالاجا بؤلومه آذربايجان آدي قويولا بيلير کي؟ يا بير باشقا اؤرنک ووردوغوم کينين تورکيه اؤزونه “تورکيه” آدي سئچه رک٫ ايستر ايسته مز “تورک” ميللتينه سئنئر ياراتيب. تورک دونياسي بيلديگيز کيمين بؤيوک آلان دئمکدير. نئچه اؤزگور اؤلکه دن اولوشور و نئچه ده ييشيک لهجه ايله دانيشير. آما تورکيه نين تانيتيمي ايله هر “تورک” تورکيه لي و هر “تورکيه لي” تورک ساييلماقدادير. بو ايش منجه يانليشدير. ايندي آد قونوسو بلکي او قدر اؤنملي گؤرونمه سين آما من بيليرم کي گله جکده سورون ياراتاجاق.

بؤتوو آذربايجان شعاري ايله ساواشا گيرمک بلکي سياسي باخيمدان يانليش گؤرونسون آما ميللي باخيمدان چوخ اؤنملي دير. گؤنتاي بئي ده يير: “اولوسلارآراسي ايليشکيلر خياللار و ايدئآللار اساسيندا قورولمور، گئرچکليکلر اساسيندا قورولور. بوتؤو آذربايجان مسئله سي اولوسلارآراسي نين گئرچگي دئييلدير.” بو بير گرچکدير. آما بو سؤز او دئمک ده يير کي بيز آناوطن٫ اودلار يوردو و آذربايجاندان واز گئچيب و تورپاقلاريميزن پارچالانماسينا گؤز يوماق. آما اگر اولوسلار آراسي بيرسيرا قايدالار اوياراق حرکت ائديب٫ آذربايجانين گؤنئي بؤلومونو اؤزگورلوقا چاتديريب٫ دولت قوروب و اولوسلار آراسي تانيتديقدان سونرا٫ او زمان قؤزئي ده حاکيم اولان دولت ايله بيرلشمه قونوسو تارتيشيلا بيلير. من امينم کي بير ميللت ايکي ياريم دولت اولماق هيچ يارارلي اولماز. بير ميللت و بير دولت ايدياسي او زمان گرچکله شه بيلير. آما داها رويايي شعارلار٫ مثلا توران چيليق بلکي سياسي-اقتصادي باخيمدان دوغرو اولور آما جغرافيائي قونوسوندا دانيشماق بيله يانليشدير. تورک بيرليگي سياسي-اقتصادي يارانا بيلير.

بو سؤزلري دئمکدن آماجيم بايراق قونوسونون اؤنميني خاطيرلاتماق دي. سياستين ايلک باساماقيندا اولان اؤيرنجي بيله بيلير کي باشقا اؤلکه نين بايراقي توخونولمازليق داشيير. بونون آنلامي ايسه بودور کي بير بايراق اؤلکه سينه عايد اولور و باشقا اؤلکه لر ايچينده يابانجي و حتي تهلوکه ساييلا بيلير. بو قونو اگر داها دريندن باخيليرسا٫ بايراق صاحيبي اولان اؤلکه اؤز بايراقي اؤچون مسئوليت داشيماقدادير. اگر قؤزئي بايراقي گؤنئي ده دالقالانيرسا٫ ميللي باخيمدان بيزه غرور وئريجي دير آما فارس رژيمي بونا نئجه ياناشاجاق؟ قؤزئي دولتي بونو نئجه ده يرلنديره جک؟

گله جکده بلکي بير ميللت اولاراق بير دولت سئچيب و يئني بايراق و باشقا سيمگه لريميز آچيق سس آلماق ايله سئچديک. کيم بيلير بلکي بو ياخينلاردا…

بايراق نه قدر اؤنمليدير؟

بايراق بير سيمگه اولاراق هر کسي بير آرايا توپلاما گؤجونه صاحيبدير. بايراق بير غرور و بير گرک دير. بايراق اگر ميللي بويوت داشييرسا٫ او زمان قونو حساس اولور و چوخ تهلوکه لي.

آذربايجان ميللي حرکاتيندا ايکي سياسيه بنزر تشکيلات وارلار کي بايراق قونوسونو يورودوب و شوونيسمين سياستينه گؤج وئريرلر. بونلارين بايراق ماراقي خيانت آدلانديريلماسا دا٫ اونا بنزر آنلام داشيير. نه زمان سورولورسا هر بيري تشکيلات بايراقي دئييب اوتورو. آما يولداشلاري ايله چاي ايچمه يه بيله گئدنده اؤز بوياديقلاري بايراقي گؤتوروب اونا ميللي يؤن وئريرلر. ندن بيزيم سياسي تانينان غير سياسي شخصلريميز کي هر بيري تشکيلات رهبري کيمين دانيشيرلار بايراق قونوسوندا هيچ بير ادديم آتميرلار. بونلار يا خائنديلر و يا بيلميرلر.

خائنلرسه بللي بير زماندا حرکتدن تميزله نه جکلر٫ بيلمز اولورسالار دا حرکتدن آتيلاجاقلار. آما بو آرادا ميللي آدلانان حرکت نه اولاجاق؟ بودور اؤنملي سورو٫ و بودور کي آذربايجان آدينا چاليشان هر بير شخص گرک بو باره ده دوشونسون.

ميللي بايراق ايله تشکيلات لوقوسو (سمبل) آراسيندا اولان فرقي بيلمه ين و بيلمه مه يه جهد گؤسترن شخصلر نئجه اؤزلرينه حاق تانييرلار کي ميللي حرکتده دانيشسينلار؟

گؤنتاي بئي يازيسيندا قونونو آيدينجا سينا اينجه له ييب و قؤزئي گؤنئي بايراق قونوسونو آچيقلاييرلار. آما نئجه اولاجاق اگر گؤنئي بايراقسيز ساواش يوروتسون؟ ايمکاني يوخمودور سيمگه اولاراق آنلام داشييان بير بايراق سئچيلسين؟

منجه بو ايش اولا بيلير. ندن؟ چونکو ايندي بايراق مسئله سي ميللت آراسينا چکيلمکده دير. بو بيلينچلنمه آدلانا بيلير و بو دؤنمده ياپيلان سئچيم دوغرويا ياخين اولا بيلير. گئچن ايللرده ياپيلان و تحميل اولونان بايراق٫ داها سونرا تله سيک بير باشقا بايراق ياپيلاراق اونا قارشيليق وئرمگه چاليشمالار٫ ميللي حرکتيميزي يولوندان چاشديريب و گئنجلر آراسيندا آيريليق ياراتير.

اگر ميللي فعاللار شستينن (تبريزده قوللانيلان بير کلمه٫ بلکي باشقا يئرلرده قوللانيلير. آنلامي ايسه اولور: آنلي آچيق٫ قورخمامازليق٫ آيدينجاسينا) بو ايکي تشکيلاتين بوياديقي بايراقلاري بير کنارا آتيب٫ قؤزئي ده دالقالانان بايراقي اينديليک قؤزئي دولتينه امانت بوراخاراق و آنلاملي بير آلتئرناتيو سوناراق بو تارتيشماتلارا سون قويوب و ميللي حرکتده گؤجله نن آيريليقا سون وئرسينلر.

ايکي تشکيلاتين نه ساواشديقلاري آلان بللي دير٫ نه وئرديکلر امک يئترليدير و نه گؤجلري اوقدر دي کي ايچريده ميللي قرارلاردا اتکي بوراخسينلار. اگر ايکي اؤچ فدايي واسطه سي ايله بوياديقلاري بايراق بير سيرا يئرلره ياپيشديريليرسا٫ بو او دئمک ده يير کي ايچريده ميللت اونا سس وئريب. شهيدلرميزين مزارينا بويالي کاغاذ ياپيشديرماق اونلارا توهين دير و بيز بونا اجازه وئرمه مه لييک.

گؤنتاي بئي٫
لوتفن بايراق اؤچون گؤنئيده آلتئرناتيو اولاراق اؤز دوشونجه زي دئيين و بير ده سيزدن ايسته ييرم کي اؤز گؤروشوزي گله جک ايللرده (احتمال ۱۳۹۰) تورک ديلي ايکينجي ديل اولاراق آذربايجاندا رسمي اولما قونوسوندا بيلديرين. منيم بيلگيلريمه گؤره ۱۳۹۰ ايلينده فارس رژيمي تورک ديلين رسميته تانياجاق. بو سؤره بلکي آزاتيلا بيلير٫ ندن کي آذربايجاندا ميللي کيمليک ايسته گي داها بؤيويور.

آذربايجان بايراقي بير کره يؤکسه ليب٫ اونو ده ييشديرن و يئنديرنين ال آياقي سينماليدير.

تبريزلي باي بک (مسعود انتظار)
گلاسگو
۲۸/۰۵/۲۰۰۷

* [1] گونئيده قوزئيين بايراغيني قالديرماق دوغرودور مو؟ (بيراينجي بؤلوم) - گؤنتاي جوانشير
** [2] آذربايجان سويو بولانماقدادير٫ خرداد ايل دؤنومونه باخيش

_ _ _ _ _ _ _
مربوط اُلان یازیلار

• ===> گونئيده قوزئيين بايراغيني قالديرماق دوغرودور مو؟ (بيراينجي بؤلوم) - گؤنتاي جوانشير
• ===> ياخين گؤنلرده آذربايجان-دا توتولانلارين ليسته سي (کامل ده يير)

• تاپيلمادي

http://www.baybak.com بای بک سایتیندان پرینت اولوب
http://www.11007.baybak.com/1074.azr یازینین اینترنت آدرسی

یازیده ایشه آلینان اینترنت آدرسلری
[1] گونئيده قوزئيين بايراغيني قالديرماق دوغرودور مو؟ (بيراينجي بؤلوم) - گؤنتاي جوانشير: http://www.11007.baybak.com/?p=1027
[2] آذربايجان سويو بولانماقدادير٫ خرداد ايل دؤنومونه باخيش: http://www.11007.baybak.com/?p=992